Almaty ákimdigi 28 Panfilovshy saiabaǵynda bolǵan vandalizmge qatysty túsinik berdi, dep habarlaidy QazAqparat.
«Qańtardaǵy jappai tártipsizdik kezinde Gogol men Pýshkin kósheleri qiylysyndaǵy 28 Panfilovshy saiabaǵynda 9 sharshy metr granit taqtaisha qiratylyp, kireberistegi jazýdyń 5 árpi urlanǵan bolatyn. Sondai-aq máńgilik alaý mańynan 2 árip urlanyp, jaýyngerlerdiń aty jazylǵan 4 shoiyn eskertkish buzyldy. Qalpyna keltirý jumystary aqpan aiynda aiaqtaldy», - habarlady qalalyq ákimdikten.
Alaida qalpyna keltirý jumystary aiaqtalǵannan keiin 4 naýryz kúni saǵat 10:00-de Gogol kóshesi jaǵyndaǵy kireberiste taǵy 2 áriptiń jáne eskertkishten 8 shoiyn mańdaishanyń joǵalǵandyǵy anyqtaldy.
Al, 5 naýryzda qoladan jasalǵan 2 áriptiń urlanǵany belgili boldy. Buzylǵan granit pen joǵalǵan áripterdiń jalpy shyǵyny 5,7 mln teńge.
Qala ákimdigi atalǵan derekterdi Almaty qalasynyń Politsiia departamenti tirkep, saiabaqtaǵy tekseris jumystaryn kúsheitkenin jetkizdi.
«Qalpyna keltirý jumystary 22 naýryzǵa deiin júrgiziletin bolady. Tarihi eskertkishterge qatysty vandalizm faktileriniń jiilep ketkendigine bailanysty qala ákimdigi almatylyqtardy qala múlkine muqiiat qarap, óz tarihymyzǵa syilastyq tanytýǵa shaqyrady», - delingen habarlamada.
