Almatyda 27 mln teńge qaryzy bar «Toyota» júrgizýshisi «Boryshker» is-sharasy kezinde ustaldy, dep habarlaidy "Ult aqparat".
Almatyda sot oryndaýshylary men Memlekettik kirister departamentiniń qyzmetkerleri birlesip, «Boryshker» jedel-aldyn-alý is-sharasyn ótkizdi.
«Is-shara kezinde qatardaǵy bólimshelerdiń jeke quramyna kólik quraldaryn toqtatýdyń negizderi men tártibi aityldy. Salynǵan aiyppuldar týraly habarlama kezinde azamattarmen qarym-qatynas júrgizý pysyqtaldy. Sondai-aq mamandandyrylǵan aiyppul turaǵyna kólik quraldaryn ornalastyrý tártibin anyqtaityn QR IIM buiryqtar men nusqaýlyqtardyń talaptaryn bultartpaý jáne qatań saqtaý qaǵidattary týraly habardar etildi. 3 kún ishinde 21 avtokólik mamandandyrylǵan avtoturaqqa qoiyldy. Kólik júrgizýshilerine 2 mln 72 myń teńge qaryzdary bar ekendigi týraly habarlamalar berildi», – dedi Almaty qalalyq Politsiia departamenti Ákimshilik politsiia basqarmasynyń bastyǵy Jandos Murataliev.
Mysaly, reid kezinde toqtatylǵan «Lada Granta» kóliginiń 31 jastaǵy júrgizýshisiniń 1 mln teńge aiyppul tólemegeni anyqtaldy.
Taǵy bir avtokólik júrgizýshisi bir apta ishinde jol qozǵalysy erejelerin segiz ret buzǵan. Bul joly aiyppuldyń mólsheri 119 myń teńgeden asty.
9 qarashada Dostyq dańǵylymen kele jatqan «Toyota» kóligi toqtatylǵan. Kólik iesiniń tólenbegen 27 mln teńge qaryzy bar bolyp shyqty.
