Almatydaǵy jappai tártipsizdik saldarynan zardap shekken ShOB sýbektilerine keltirilgen shyǵyndardy óteý úshin aimaqtyq komissiianyń kezekti otyrysynda 337,4 mln teńge somasyna 204 ótinim maquldandy, dep habarlaidy "Ult aqparat" ákimdiktiń resmi saityna silteme jasap.
Onyń ishinde 208,3 mln teńge somasyna 111 ótinim «Jańa Alataý» qaiyrymdylyq qory arqyly jiberildi; 93 kásipkerge 129,1 mln teńge somasynda ótemaqy biýdjetten tólenetin bolady (ainalym boiynsha resmi derekterge sáikes, esep aiyrysýdyń ońailatylǵan formýlasy boiynsha málimdelgen shyǵynnyń tolyq somasyna). Al, komissiia jumysy bastalǵannan beri barlyǵy 370,3 mln. teńge somasyna 221 ótinim maquldandy.
Komissiia jumysy jalǵasýda. Kásipkerlerdiń ótinimderi usynylǵan qujattardyń tolyqtyǵyna orai muqiiat zerdelenedi jáne komissiia músheleriniń ashyq daýys berýleri arqyly qaralady.
«Buryndary aimaqtyq komissiia shyǵyndy óteý tetigindegi kemshilikterdi anyqtap, ony jaqsartý sipatynda óz usynysyn engizgen bolatyn. Osylaisha, tólemderdiń shekti somasy 5 mln teńgege deiingi jeńildetilgen tetik boiynsha zalaldy óteý tetigi kózdelgen. Bul zardap shekken biznes sýbektilerin qamtýdy edáýir keńeitýge jáne ótemaqy tóleýdi jedeldetýge múmkindik beredi. Sondai-aq, memlekettik biýdjet qarajatymen qatar qorlardyń jeke qarjysynan tólemder qarastyrylǵan. Ótemaqy tóleý tetigin jetildirý jónindegi jumys jalǵasýda», - dep málim etti ákimdikten.
