Foto: Pexels.com
Almaty qalasy boiynsha Qarjylyq monitoring agenttiginiń departamenti kólik quraldaryn zańsyz tirkeý deregi boiynsha tergeýdi aiaqtady, dep habarlaidy Ult.kz
Anyqtalǵandai, úsh jyl boiy bir top adam Arnaiy HQKO qyzmetkerlerimen birge kólikterdi bastapqy tirkeýge arnalǵan alymdy tólemei, jalǵan tirkeý shemasyn júzege asyryp kelgen.
Shema deldaldar arqyly jumys istegen. Olar alymnan jaltarǵysy keletin azamattardy taýyp, kólikterdi jalǵan tulǵalardyń atyna rásimdep otyrǵan. HQKO qyzmetkerleri aqparattyq júiege jalǵan málimetter engizip, zańsyz tirkeýdi qamtamasyz etken.
Tergeý nátijesinde 132 avtokólik zańsyz tirkelgeni anyqtaldy. Memleketke keltirilgen shyǵyn kólemi 1,2 mlrd teńgeden asqan. Is barysynda 273 mln teńge kólemindegi alymdar erikti túrde óteldi.
Sot úkimimen úsh adam 3 jyldan 4 jyl 6 aiǵa deiingi merzimge bas bostandyǵynan aiyryldy. Sondai-aq qylmystyq jolmen alynǵan 7 avtokólik tárkilendi. Úkim zańdy kúshine endi.
