Almatyda qalalyq TJD Keńsai-1 musylman ziraty tusynda qoqys poligony órtenýine bailanysty turǵyndardyń shaǵymyna jaýap berdi, dep habarlaidy "Ult aqparat".
Áleýmettik jelide qala turǵyndary 4 kún boiy órttiń sóndirilmegenin aityp shaǵymdanǵan bolatyn.
«Keńsai-1 ziratynyń mańyndaǵy qoqys úiindisi órtenip jatyr. Bul qoqysty zirat jumysshylary úigen. Tórt kún boiy tútin shyǵyp jatyr. Sársenbaev kóshesinde turatyn turǵyndarǵa tynys alý óte qiyn. Órtti sóndirmei-aq, qoqysty shyǵarmasa bolmaidy. Qaladaǵy órte qarsy qyzmetke habarlastyq. Biraq, nátije joq», - dedi turǵyndar.
Áleýmettik jelidegi saýalǵa qalalyq TJD ókilderi jaýap berdi. Olar órt bastalǵan kúnnen bergi jumystardy hronologiialyq tártippen tizip shyqty.
«QR zańnamasyna sáikes 101 jelisine túsken qońyraýǵa mindetti túrde jaýap beriledi. Departamentke kelip túsken barlyq habarlama boiynsha áreket etedi. 8 mamyrda saǵat 22:30-da 101 nómirine habarlasqan turǵyndar «Keńsai-1» musylman ziratynyń qasynda órt bastalǵanyn aitty. Oqiǵa ornyna órt sóndirýshiler jetýi qiyn boldy. Órt sóndirýshiler kelgende aýdany 50 sharshy metr aýmaq órtenip jatqan. Órtti sóndirýge 10 adam, 2 avtotsisterna jumyldyryldy. Órt túngi saǵat 00:22 minýtta sóndirildi», - dedi TJD baspasóz qyzmetinen.
Departament ókilderiniń aitýynsha, 9 mamyrda sol jerde tútin shyqpaǵan, sebebi jaýyn jaýǵan bolatyn.
«11 mamyrda 20:31 minýtta sol aýdannyń turǵyny 101 dispetcherine «Keńsai-1» musylman ziratynda órt bastalǵanyn habarlady. Órt sóndirýshiler oqiǵa ornyna jaiaý jetýge májbúr boldy. Belgili bolǵandai, ol jerde de qoqys órtengen. Aýdany 50 sharshy metr órt túngi saǵat 21:17-de sóndirildi. Bul órtti sóndirýge 6 adam men 1 kólik jumyldyryldy. Al 12 mamyrda saǵat 11:53-te taǵy musylman ziratynda órt shyqqany týraly habarlama túsken. Oqiǵa ornyna barǵanda órt sóndirýshiler órtengen jer shoqtanyp byqsyp jatqanyn kórgen. Tútindegen 30 sharshy metr aýmaq saǵat 12:26-da sóndirildi. Tótenshe jaǵdaidan eshkim japa shekken joq», - dedi TJD ókilderi.
