Bas prokýratýra Qazaqstanda ótken tártipsizdikter saldarynan qamaýǵa alynǵandar sanyn aitty, dep habarlaidy "Ult aqparat" vedomstvonyń baspasóz qyzmetine silteme jasap.
Memleket basshysy Qasym-Jomart Toqaevtyń tapsyrmasy boiynsha Bas prokýratýra "Almaty qasiretiniń" jáne basqa óńirlerdegi terroristik shabýyldardyń barlyq sebebi men egjei-tegjeiin anyqtaý úshin jumys istep jatqany habarlandy.
Vedomstvo málimetinshe, quqyq tártibi organdary terroristik shabýyldarǵa qatysýshylardy anyqtaý jáne jazalaý, eldegi qoǵamdyq qaýipsizdikti tolyq qalpyna keltirý boiynsha barlyq qajetti sharany qabyldaýda.
Adam shyǵyny bolǵan oqiǵalardy tergep-tekserýlerge erekshe nazar aýdarylǵan. El boiynsha jalpy sany anyqtalyp jatyr. Árbir fakt tiisti quqyqtyq baǵa berýmen muqiiat tergep-tekseriledi.
"TJ rejimi kezeńinde jasalǵan quqyq buzýshylyqtar úshin 6966 ákimshilik is júrgizýler qozǵaý týraly hattamalar toltyryldy, ártúrli ákimshilik jaýaptylyqqa 4918 adam tartyldy, onyń ishinde 1978 adam qamaqqa alyndy. 791 adamǵa aiyppul salyndy jáne 2149-y eskertildi. Sottardyń qaraýynda 2048 material bar.
Búginde jedel-tergeý toptary 494 qylmystyq isti, onyń ishinde 44 – terrorizm aktileri boiynsha, 34 – jappai tártipsizdikter boiynsha, 15 adam óltirý jáne basqalary boiynsha tergep-tekserýde.
Qylmys jasady degen kúdikpen 524 adam ýaqytsha ustaý izoliatorlaryna qamaldy. Sottyń sanktsiiasymen 412 adam qamaýǵa alyndy.
Qazirgi ýaqytta qajetti tergeý áreketteri júrgizilýde" - delingen habarlamada.
Sondai-aq Bas prokýratýranyń málimdeýinshe, azamat qylmys jasady degen kúdikpen sottyń sanktsiiasynsyz 48 saǵattan aspaityn merzimge ustap alynýy múmkin (QPK-niń 14-babynyń 2-bóligi).
Biraq asa aýyr, terroristik nemese ekstremistik qylmys, jappai tártipsizdik barysynda, sondai-aq tótenshe jaǵdai kezinde qylmys jasady degen kúdikke ilingen kezde 72 saǵattan aspaityn merzimge ustap alýǵa jol beriledi (QPK-niń 131-babynyń 4-bóligi).
Ákimshilik quqyq buzýshylyqtyń jolyn kesý, ony jasaǵan kúdiktiniń jeke basyn anyqtaý, hattama jasaý jáne t.b. maqsattarda 3 saǵatqa deiingi merzimge ustap alynýy múmkin.
Eger ákimshilik is qozǵalǵan baptyń sanktsiiasy jazalaý sharalarynyń biri retinde qamaqqa alýdy kózdeitin bolsa, onda 24 saǵatqa deiin ustap alynýy múmkin (ÁQBtK-niń 789-babynyń 3-bóligi).
Komendanttyq saǵattyń engizilýine bailanysty belgilengen tártipti buzýǵa jol bergen adamdar komendanttyq saǵat aiaqtalǵanǵa deiin, al ózimen birge qujattary joq adamdar – olardyń jeke basyn anyqtaǵanǵa deiin, 48 saǵattan aspaityn ýaqytqa ustalýy múmkin (ÁQBtK-niń 789-babynyń 2-bóligi).
"Bul rette, jeke basy anyqtalmai ustap alynǵandar sottyń sanktsiiasymen qabyldaý-taratý oryndaryna ornalastyrylady. Jeke basyn anyqtaǵannan keiin, eger olardyń is-áreketterinde qylmystyq nemese ákimshilik quqyq buzýshylyq belgileri baiqalmasa, olarǵa qandai da bir sharalar qoldanylmai, dereý bosatylady.
Barlyq jetkizilgen jáne ustalǵan adamdardyń qorǵalýǵa jáne bilikti zań kómegin alýǵa konstitýtsiialyq quqyǵy qamtamasyz etilip otyrǵanyn atap ótken jón.
Azamattar men olardyń ókilderi aýmaqtyq politsiia jáne prokýratýra organdaryna sáikes aryzdarmen júginýge quqyly. Árbir ótinish boiynsha tekserý júrgiziletin bolady.
Qazaqstan Respýblikasynyń Bas prokýratýrasy azamattardy zańdylyqty saqtaýǵa, jalǵan aqparatqa boi aldyrmaýǵa jáne resmi aqparat kózderine ǵana senýge shaqyrady" - delingen habarlamada.
