«Almatydaǵy LA-155/18 mekemesiniń tergeý izoliatorynda ustalǵandardy azaptaityn jertóle bar». Internette taraǵan osy aqparattyń shynaiylyǵyn tekserý úshin búgin atalǵan mekemege arnaiy tekseris júrgizildi, dep habarlaidy QazAqparat.
Qańtar oqiǵasynan keiin BAQ pen áleýmettik jelilerde Almatydaǵy LA-155/18 mekemesiniń tergeý izoliatorynda qamalǵandardy azaptaýǵa arnalǵan jertóle jasaqtalǵany týraly aqparat jariialana bastady. Osyǵan orai, Almaty qalasy jáne Almaty oblysy boiynsha qoǵamdyq baqylaý komissiiasy men Almaty qalasy prokýratýrasynyń ókilderi atalǵan mekemeniń tergeý izoliatoryna kelip, tekseris júrgizdi.
Almaty qalasy boiynsha qylmystyq atqarý júiesi (QAJ) departamentinen habarlaǵandai, Almaty qalasyndaǵy tergeý izoliatory 1360 adamǵa arnalǵan. Alaida, qańtar aiynda tergeý barysyna qamalǵandardyń sany 1400-den asyp ketti. Qańtarda qalyptasqan erekshe jaǵdailarǵa bailanysty 200 oryndyq ýaqytsha oqshaýlaý blogy ashyldy.
«Tergeý izoliatorynyń, rejimdik korpýstardyń jáne jertóle úi-jailarynyń aýmaǵyn aralaý júzege asyryldy. QAJ mekemesiniń aýmaǵynda eki qabatty ákimshilik ǵimarat jáne 4-5 qabatty 6 rejimdik korpýs ornalasqan. Atalǵan rejimdik korpýstarda kommýnikatsiialyq júieler men jylytý toraptaryna arnalǵan jartylai jertóle úi-jailary bar. Bul úi-jailarǵa kirý korpýstardyń syrtqy jaǵynan júzege asyrylady. Mekemege túsýshilerdi qabyldaý rejimdik korpýstyń birinshi qabatynda júrgiziledi», - dedi QAJ departamentinen.
Korpýstardy aralaý qorytyndysy boiynsha arnaiy jabdyqtalǵan kameralar men úi-jailar anyqtalǵan joq.
«Aita keteiik, kórineý jalǵan aqparat taratqany úshin QR Qylmystyq kodeksiniń 274-baby boiynsha qylmystyq jaýapkershilik kózdelgen», - dep eskertý jasady Almaty qalasy boiynsha qylmystyq atqarý júiesi (QAJ) departamentinde.
Eske salaiyq, Almatydaǵy LA-155/18 mekemesiniń tergeý izoliatorynda azaptaýǵa arnalǵan jertóle joqtyǵyn QR Ishki ister ministrligi de málim etken edi.
