Foto: ashyq derekkóz
Almaty Superski jańa taý shańǵysy kýrorty aimaqqa shetelden jańadan úirenip júrgen shańǵyshylar men týristerdi tartýǵa baǵyttalǵan. Bul týraly Pas Grau International kompaniiasynyń operatsiialyq direktory Tomas Tor-Ensen habarlady.
Onyń aitýynsha, kýrorttyń artyqshylyǵy – Almatyǵa jaqyn ornalasqanynda. Negizgi basymdyq qorshaǵan ortaǵa áserdi azaitýǵa, iaǵni sý men elektr energiiasyn tutynýdy azaitýǵa múmkindik beretin jańa tehnologiialardy qoldanýǵa berilgen. Al «Medeý» bazalyq stansasyn kýrortpen bailanystyratyn zamanaýi aspaly jol jobanyń mańyzdy elementi bolady.
«Bolashaqta bul joba óńirge orasan zor ekonomikalyq oń áser bermek, óitkeni munda 5 myńnan astam jańa jumys ornyn ashýǵa múmkindik bar. Biz búkil jobany tutasymen qyzyqty dep sanaimyz. Ol kóptegen "jasyl" jáne "kók" trassalarda serýendeýge qolaily jaǵdai jasai otyryp, ekologiia men turaqty damýdy, demalys pen kelýshilerdiń rahat sezimin keremet úilestiredi», - dep atap ótti Tomas Tor-Ensen.
Sheteldik týristerdi, atap aitqanda Qytai men Úndistannyń iri naryqtarynan tartý strategiiasyna erekshe nazar aýdarylyp otyr. Kýrort jańadan úirenip júrgen shańǵyshylarǵa baǵyttalǵan, sondai-aq, ol bul aimaqta joq ónimdi usynady.
«Atalǵan jobanyń erekshe tusy – kýrorttyń eń biik núktesi 3400 metr biiktikte ornalasqanynda. Bul óte biik jáne ol jerden taý ańǵary men Almaty qalasyna 360 gradýsqa keremet panoramalyq kórinis ashylady. Bul Úndistannan, Qytaidan jáne basqa elderden keletin týristerdi shynymen de qyzyqtyratyn dúnie», - dep atap ótti Tomas Tor-Ensen.
