Foto: egemen.kz
Almaty qalasynyń prokýratýrasy Ál-Farabi dańǵylynda úsh adamnyń ómirin qiǵan aýyr jol-kólik oqiǵasyna qatysty jańa derekterdi jariialady. Is qaita saraptamadan ótkizilgen. Bul týraly Ult.kz 31-arnanyń “Informbiýro” baǵdarlamasyna silteme jasap habarlady.
Buǵan deiin atalǵan is “jol qozǵalysy erejelerin buzý saldarynan abaisyzda eki nemese odan da kóp adamnyń ólimine ákelý” baby boiynsha qaralǵan. Atalǵan bapqa sáikes kináliler 5 jyldan 10 jylǵa deiin bas bostandyǵynan aiyrylýy múmkin.
Sonymen qatar negizgi qylmystyq ispen qatar, politsiia qyzmetkeriniń áreketsizdigine bailanysty taǵy bir is tergelip jatqany belgili boldy.
“Basqa da kináli laýazymdy tulǵalar tártiptik jaýapkershilikke tartyldy”, – dep málimdedi prokýratýra ókilderi.
Aita keteiik, bul qaiǵyly jaǵdai qoǵamda úlken rezonans týǵyzdy. Belsendiler tek kinálilerdi jazalaýmen shektelmei, júieli ózgerister engizýdi talap etip otyr.
Áleýmettik jelilerde Ál-Farabi dańǵylyna qarsy baǵyttardy bólip turatyn qorshaýlar ornatý týraly petitsiia jariialandy. Bastama kótergender mundai sharalar qarsy jolaqqa shyǵýdyń aldyn alyp, adam shyǵynyn azaitýǵa yqpal etedi dep esepteidi.
Eske salsaq, 21 naýryz kúni Almatydaǵy Ál-Farabi dańǵyly men Meńdiqulov kóshesiniń qiylysynda aýyr jol apaty bolǵan edi. Zeekr markaly avtokóliktiń júrgizýshisi batys baǵytta kele jatyp, qarsy jolaqqa shyǵyp ketken. Sonyń saldarynan ol qarsy baǵytta kele jatqan Mercedes kóligimen soqtyǵysqan. Apat nátijesinde 29 jastaǵy Mercedes júrgizýshisi men 20 jáne 23 jastaǵy eki jolaýshy oqiǵa ornynda qaza tapty. Al Zeekr kóliginiń júrgizýshisi túrli jaraqattarmen aýrýhanaǵa jetkizildi.
