Almaty oblysy Qapshaǵai qalasynyń Zarechnyi kentine karantin rejimi engizildi, dep habarlaidy "Ult aqparat" óńir ákiminiń baspasóz qyzmetine silteme jasap.
Búgin, saǵat 13.20-daǵy sońǵy málimet boiynsha, Qazaqstanda koronavirýs juqtyrǵan taǵy 68 adam anyqtaldy. Onyń ishinde 13 naýqas Almaty oblysynyń Qapshaǵai qalasynda tirkeldi. Olardyń 5-eýi Qapshaǵai qalasynda, 6-aýy Zarechnyi aýylynda anyqtalsa, 2-eýi – Atyraýdan jetkizilgen «Teńizshevroil» JShS-nyń vahtalyq jumysshylary. Aýyrǵandardyń úlkeni 62 jasta bolsa, kishisi - 9 ailyq bala.
Osy kúnge deiin Qapshaǵai óńirinde jalpy sany 15 adam tirkelip otyr. Osyǵan bailanysty Qapshaǵai qalalyq shtabtyń sheshimimen Zarechnyi kentine búginnen bastap karantin rejimi engizildi.
«Anyqtalǵan naýqastardyń barlyǵy tiisti em alý úshin meditsina mamandarynyń baqylaýyna alyndy. Olarmen bailanysta bolǵan 187 adam anyqtaldy, onyń 24-i – jaqyn bailanys jasaǵandar, 163-i – syrttai qarym-qatynasta bolǵandar. Barlyǵy oqshaýlandyrylyp, epidemiologiialyq tekserýler júrgizilýde», - delingen oblys ákimdiginiń aqparatynda. .
