Almaty oblysynda aýa temperatýrasy kóterilip, jaýyn-shashyn men qar erýine bailanysty jeke turǵyn úilerdiń aýlalaryn sý basty. Bul týraly QR Tótenshe jaǵdailar ministrliginiń resmi ókili Talǵat Ýáli málimdedi, dep habarlaidy «Ult aqparat».
Onyń derekterine qaraǵanda, Almaty oblysyndaǵy Eskeldi aýdanynyń Eshkiólmes jáne A.Aldabergenov aýylyn, sondai-aq Kóksý aýdanynyń Talapty aýylyn sý basqan.
«8 aqpan kúni túnde Almaty oblysynyń TJD-ǵa 3 eldi mekeninde jeke turǵyn úilerdiń 40 aýlasy sý astynda qalǵany týraly habarlama kelip tústi. Almaty oblysy TJD jáne jergilikti atqarýshy organdardyń qyzmetkerlerim Eskeldi aýdany Eshkiólmes aýylyndaǵy oqiǵa ornynan 10 adamdy evakýatsiialady jáne olar orta mektepke ornalastyryldy. Motopompalardyń kómegimen sý sorǵytyldy. TJD-da jedel shtab qurylyp, jedel jeli jumys istep jatyr. Qazirgi ýaqytta aryqtardy tereńdetý, úiindi bóget salý jáne erigen sýdy burý boiynsha jumystar júrgizilip jatyr»,-dedi resmi ókil.
Ol keltirgen derekterge qaraǵanda, sý basqan jerlerde barlyǵy Almaty oblysy TJD kúshteri men quraldary 67 qyzmetker, 15 birlik tehnika, 18 motopompa, jergilikti atqarýshy organdardan 28 qyzmetker, 5 birlik tehnika jáne 5 birlik motopompa, APB 7 qyzmetker, 3 birlik tehnika jumyldyryldy.
«QR TJM azamattardan sý tasqyny qaýpi bar kezeńde qaýipsizdik erejelerin saqtaýdy, aýla aýmaqtaryna irgeles aryq jelilerin qar men qoqystan ýaqytyly tazartýdy suraidy. Qutqarý qyzmetiniń biryńǵai telefony 101 nemese 112»,-delingen habarlamada.
