Citic Construction kásipornynda zańsyz jumys isteitin sheteldik azamattar tekseristen keiin deportatsiialandy, dep habarlady Almaty oblystyq sotynyń baspasóz qyzmeti.
Taldyqorǵan mamandandyrylǵan ákimshilik soty, sondai-aq Aqsý aýdandyq soty Ákimshilik quqyq buzýshylyq týraly kodekstiń 517-babynyń 2-bóligi (Sheteldikterdiń nemese azamattyǵy joq adamdardyń halyqtyń kóshi-qony týraly zańnamany buzýy) boiynsha 70 Qytai azamatyna qatysty qozǵalǵan ákimshilik isti qarady.
Vedomstvonyń habarlaýynsha, 9 qazandaǵy sot sheshimderimen QHR-nyń barlyq 70 azamaty kináli dep tanylyp, olarǵa elden shyǵarý túrinde ákimshilik jaza qoldanyldy.
Sot aktileri kúshine endi, shet memlekettiń azamattary Qazaqstan aýmaǵynan shyǵaryldy.
Eske sala keteiik, qazan aiynyń basynda Taldyqorǵan mańynda jol qurylysymen ainalysatyn kásiporynda sheteldik jumysshylar men jergilikti turǵyndar arasynda janjal shyqqan. Citic Construction kásipornynyń bir top jumysshysy videoúndeý jazǵan. Onda QHR-nyń úsh azamaty júrgizýshi – etnikalyq qazaqty soqqyǵa jyqqany aitylady.
Politsiianyń málimetinshe, janjal tórt jumysshy – Qytai azamattary arasynda bolyp, sońy tóbeleske ulasqan. Tóbeles saldarynan olardyń biri – etnikalyq qazaq jaraqat alǵan. Kináliler Ákimshilik quqyq buzýshylyq týraly kodeksiniń 73-1 baby boiynsha (Densaýlyqqa qasaqana jeńil ziian keltirý) ákimshilik jaýapkershilikke tartyldy.
Ekinshi kúni bir top jergilikti turǵyn janjaldyń mánin túsinbei, kásiporyn aýmaǵynda bolǵan birneshe sheteldik jumysshyny uryp-soqqan. Saldarynan tórt Qytai azamaty jaraqat alyp, aýrýhanaǵa jetkizildi.
Jappai tóbelesten keiin quqyq qorǵaý organdary tekseris júrgizip, zańsyz jumys isteitin 70 sheteldik jumysshyny anyqtady.
