Almaty oblysynyń Aqtas kentindegi respýblikalyq psihiatriialyq aýrýhanada patsientterdiń quqyqtary buzylǵany týraly áleýmettik jelide taraǵan aqparat resmi tekserý barysynda rastalǵan joq, dep habarlaidy ult.kz.
Buǵan Instagram jelisinde jariialanǵan jazba sebep bolǵan. Onda meditsinalyq uiym patsientterine fizikalyq shekteý sharalary qoldanylǵany, dári-dármekter yqpal etý quraly retinde paidalanylǵany jáne olardyń ar-namysyna tietin áreketter jasalǵany aitylǵan.
Osyǵan bailanysty QR Densaýlyq saqtaý ministrligi Meditsinalyq jáne farmatsevtikalyq baqylaý komitetiniń Almaty oblysy boiynsha departamenti atalǵan meditsinalyq uiymǵa tekserý júrgizdi.
Jazba avtory (Nikolai Jumaǵaliev - red.) sipattaǵan oqiǵalar 2008 jyly, aýrýhananyń 7, 10 jáne 12-bólimshelerinde bolǵanyn aitqan. Iaǵni sóz shamamen 18 jyl burynǵy oqiǵalar týraly bolǵan. Sonymen qatar jariialanymda avtordyń derbes derekteri kórsetilmegen.
Qoǵamdyq rezonansqa bailanysty tekserý kezinde patsientterge meditsinalyq kómek kórsetý kezinde zań talaptarynyń saqtalýy, psihikalyq densaýlyq salasyndaǵy meditsinalyq-áleýmettik kómektiń sapasy jáne patsientterdi dári-dármekpen qamtamasyz etý máseleleri qaraldy.
2026 jylǵy 7 tamyzdaǵy tekserý qorytyndysyna sáikes, patsientterge fizikalyq shekteý sharalary qoldanylǵany, dárilik preparattardyń yqpal etý sharasy retinde paidalanylǵany nemese patsientterdiń ar-namysyna tietin ózge de áreketter jasalǵany týraly málimetter rastalmaǵan.
Osylaisha, áleýmettik jelidegi jariialanymda keltirilgen málimdemeler resmi tekserý barysynda anyqtalǵan naqty derekterge sáikes kelmegen.
Densaýlyq saqtaý ministrligi patsientterdiń quqyqtary, ar-namysy men qaýipsizdigi basty basymdyqtardyń biri ekenin atap ótti. Psihikalyq buzylystardy diagnostikalaý jáne emdeý qoldanystaǵy zańnama talaptaryna sáikes júrgiziledi.
Ministrlik meditsinalyq kómektiń sapasy men patsientterdiń quqyqtarynyń saqtalýyna baqylaýdy jalǵastyratynyn málimdedi.
Sondai-aq vedomstvo kórineý jalǵan aqparat taratqany úshin, onyń mazmuny men taratý jaǵdaiyna qarai Qazaqstan zańnamasynda jaýapkershilik qarastyrylýy múmkin ekenin eskertti.
Aita keteiik, buǵan deiin Jelide adamjegish Nikolai Jumaǵaliev psihiatriialyq aýrýhananyń jaǵdaiy nashar ekenin aitqan videosy taraǵan bolatyn.
