Almaty oblysynyń politseileri Qytaidyń kásipornyna qarýly shabýyl jasaǵan qylmystyq topty ustady, dep habarlady oblystyq politsiia departamentiniń baspasóz qyzmeti.
10 qazan, juma kúni tańerteń maska kigen belgisiz bireýler Ile aýdany Ótegen batyr aýylyndaǵy kásiporynǵa shabýyl jasaǵan. Olar 37 jastaǵy esepshi – Qytaidyń azamatyn soqqyǵa jyǵyp, pyshaqpen qorqytyp, 3 million 200 myń teńge aqshany qoldy etken.
"Táýlik boiy Ile aýdany men oblystyq politsiia qyzmetkerleri birlese, alty kúdiktini anyqtady. Olardyń ekeýi – 1995 jáne 1996, al tórteýi 2000 jyly týǵan. Almaty qalasy, Almaty jáne Jambyl oblysynyń turǵyndary. Pyshaq pen aqshanyń bir bóligi qylmystyq tergeý materialy retinde qarastyrylady", - dep habarlady Almaty oblysy politsiiasynyń baspasóz qyzmeti.
Qylmystyq kodekstiń 192-baby 3-bóligine ("Qaraqshylyq") sáikes, sotqa deiingi tergeý bastaldy. Kúdiktiler ýaqytsha ustaý izoliatoryna qamaldy.
Politsiiadaǵylar qylmystyq toptyń árbir múshesiniń óziniń róli bolǵanyn aitty. Bireýi sol kásiporynda jumys istegen. Ekinshisi kólikte kútken, al ózgeleri shabýyl jasaǵan. Qazirgi ýaqytta kúdiktilerdiń ózge qylmysqa qatysy tekserilip jatyr.
