Almaty oblysy, Eńbekshiqazaq aýdany, Esik qalasyndaǵy Jastar saiabaǵynda Jambyl Jabaevtyń, al, Mádeniet úiiniń aldyndaǵy gúlzarda Tumanbai Moldaǵalievtiń eskertkishi ashyldy.
Qos alyptyń bir kúnde ashylǵan músinderiniń saltanatty jiynynda oblys ákiminiń orynbasary Jaqsylyq Omar: "Elbasymyz Nursultan Nazarbaev «Bolashaqqa baǵdar: rýhani jańǵyrý» atty baǵdarlamalyq maqalasynda «Ulttyq mádeniet saqtalmasa, eshqandai jańǵyrý bolmaidy» degen edi. Búgingi sharany ulttyq mádenietke arnalǵan igi isterdiń bir parasy dep bilińizder. Ótken jyly Serbiianyń Belgrad qalasynda Jambyl babamyzǵa eskertkish ornatyldy. Búgingi shara sonyń zańdy jalǵasy", – dedi.
Budan keiin Qazaqstan Jazýshylar odaǵy basqarmasynyń tóraǵasy, aqyn Nurlan Orazalin sóz sóiledi: Esik óńiri – qasietti jer. Onda ejelgi babalarymyzdyń súiekteri jatyr. Saq, úisin dáýirinen qalǵan jádigerler solar jaily bizge syr shertip turǵandai. Altyn adam búkilalashtyq ortaq simvolǵa ainaldy. Osy jerde uly jyraýdyń eskertkishiniń ashylǵany jaqsylyqtyń nyshany.
Jambyl urpaqtary atynan Áskerbek Abaev sóz alyp, baba murasynyń búgingi urpaqtarmen qaýyshyp jatqanyn, jyr alybynyń qazaqpen birge máńgi jasaitynyn, búgingi saltanat sonyń dáleli ekenin tilge tiek etti. Biiktigi 5 metr, tuǵyry granitten quiylǵan Jambyl babamyzdyń qola músinin jasaǵan Nurǵalym Isabaev. Sáýletshileri – Jangeldi Osan men Seiithan Qyrqynbaev.
Jaqsylyq Omar, Nurlan Orazalinder sóz sóilep, aqynnyń qazaq ádebietinen alar orny men el rýhaniiatyndaa sińirgen ornyna toqtalyp, sóz sóilese, Shómishbai Sariev aqynǵa arnaǵan óleńin oqydy. M. Áýezov atyndaǵy ádebiet institýtynyń direktory, filologiia ǵylymdarynyń doktory Ýálihan Qalijan aqyn jaily estelikter aitty.
Kezinde Tumaǵańnyń ózi qyzmet etken «Baldyrǵan» jýrnalynyń bas redaktory Dúisen Maǵlumov bastaǵan jýrnalister qaýymy da aqynǵa qurmet kórsetti. Aqynnyń jary Kúltai apa bul sharany uiymdastyrýshylarǵa, kópshilikke rizashylyǵyn bildirip, alǵys aitty.
Tumanbai beinesiniń músinshisi – Altai Beisenov. Sáýletshisi – Qurmanǵazy Qadyrov. Saltanatty jiynnyń sońy merekelik kontsertpen jalǵasty. Belgili óner qairatkerleri Nurǵali Núsipjanov, Maqpal Júnisova, Sulýshash Nurmaǵanbetovalar bastaǵan ónerpazdar án shyrqap, elge qutty bolsyn aitty.
Almas NÚSIP,
«Egemen Qazaqstan» gazeti
