Almaty oblysy, Aqsý aýdanynda temir jol tasymaly salasynda 30 jyldan astam eńbek etip kele jatqan Bókeevter áýleti «Úzdik eńbek áýleti» atandy.
Jeńimpazdarǵa oblys ákiminiń orynbasary Jaqsylyq Omar diplom men 500 myń teńge aqshalai syilyqtyń sertifikatyn tapsyrdy. Bul týraly Taldyqorǵan qalasyndaǵy I. Jansúgirov atyndaǵy Mádeniet saraiynda ótken Eńbek kúnine arnalǵan saltanatty jiynda belgili boldy.
Jinalǵandardy Eńbek kúni merekesimen quttyqtaǵan oblys ákiminiń orynbasary Jaqsylyq Omar oblystyń ár turǵyny óńirdiń áleýmettik-ekonomikalyq damýyna óz úlesin qosqanyn atap ótti.
- Memleket basshysynyń Jalpyǵa ortaq Eńbek qoǵamyn qurý ideiasy sheńberinde Qazaqstan Respýblikasy Prezidentiniń Jarlyǵymen 2013 jyly Eńbek kúni merekesi belgilendi.
Osy aitýly kún óz isiniń sheberleri, ardagerler, eńbek adamdary, Qazaqstannyń ekonomikasyn damytý men nyǵaitýǵa úles qosqan azamattardyń barlyǵy úshin de – mereke. Búgingi kúni Almaty oblysy áleýmettik-ekonomikalyq turǵyda tyń serpinmen damyp keledi. Bul - sizderdiń kúndelikti birlesken eńbekterińizdiń jemisi. Sol úshin sizderge oblys basshysynyń atynan zor alǵys bildiremin! – dedi J. Omar.
Budan ári oblys ákiminiń orynbasary:
- Almaty oblysy eńbek dástúrlerine óte bai. Bul dástúrdi mamandardyń jańa býyny jalǵastyrýy kerek. Biz sizderdiń árqaisylaryńyzben maqtanamyz, halqymyz ben Otanymyzdyń gúldenýine baǵyttalǵan jetistikterińiz ben eńbektegi tabystaryńyzdy baǵalaimyz. Oblys basshylyǵynyń atynan sizderdi taǵy bir márte quttyqtaimyn! Barshańyzǵa myqty densaýlyq, molshylyq pen eseli eńbek tileimiz! – dep qorytyndylap, marapattaý rásimen kóshti.
Eńbektegi joǵary jetistikteri men uzaq jylǵy jemisti jumysy úshin birqatar azamattar oblys ákiminiń Qurmet gramotasymen jáne Alǵys hatymen marapattaldy. QR Aqparat jáne kommýnikatsiia ministrliginiń «Eńbek ardageri» medali «Qazaqtelekom» AQ Almaty oblystyq telekommýnikatsiia direktsiiasy filialy bas direktorynyń keńesshisi, Taldyqorǵan qalasy qoǵamdyq keńesiniń tóraǵasy Jeksembai Meirembaevqa berildi.
Munan keiin oblystyq «Eńbek joly» konkýrsynyń jeńimpazdaryna syilyqtar tabys etildi. Atap aitqanda, «Úzdik eńbek áýleti» nominatsiiasynda Aqsý aýdanynda temir jol tasymaly salasynda 30 jyldan astam eńbek etip kele jatqan Bókeevter áýleti jeńimpaz atanyp, otbasyna 500 myń teńgeniń sertifikaty berildi. Sarqan aýdanyndaǵy «Jetisý izoliator» mekemesinde 5 jyldan beri injener laýazymyn atqaryp kele jatqan Arman Mýsin «Óndiristiń eń jas úzdik jumysshysy» atandy. Jas mamanǵa da 500 myń teńgeniń sertifikaty berildi. Osyndai sertifikat «Jumys istep júrgen jastardyń úzdik tálimgeri» atanǵan Rýdnyi aýylyndaǵy № 17 orta mekteptiń fizika pániniń muǵalimi Altynai Álqýatqa da tabystaldy. Konkýrsta ekinshi oryn alǵan júldegerlerdiń árqaisysy 300 myń teńgeniń sertifikatyn ielendi.
Sol siiaqty osyndai nominatsiialar boiynsha oblys ákimdiginiń resmi saityndaǵy onlain-daýys berý boiynsha jeńimpaz atanǵan taǵy úsh qatysýshy da marapattaldy. Olardyń árqaisysyna syilyq retinde 200 myń teńgeniń sertifikaty berildi.
Marapatqa ie bolǵandar atynan Jeksembai Meirembaev pen Arman Mýsin sóilep, ózderine kórsetilgen qoldaý úshin rizashylyqtaryn jetkizip, budan keiin de el igiligi jolynda eńbek etetindikterin aitty.
Saltanatty shara kontserttik baǵdarlamamen aiaqtaldy.
Jalpy, Almaty oblysynda negizgi salalardyń ósimi 2,8% qurap otyr. Ónerkásip óniminiń kólemi 4,5% ósip, 468,5 mlrd. teńgege jetti. Aýyl sharýashylyǵynda ósim 1,5% nemese 281,6 mlrd.teńge. Sonymen qatar Indýstriialandyrý kartasy boiynsha jyl basynan beri shyny jáne metall konstrýktsiialaryn shyǵaratyn jalpy quny 14,3 mlrd. teńgelik 2 kásiporyn iske qosylǵan bolatyn. Jyl sońyna deiin qosymsha taǵy 5 jobany júzege asyrý josparlanǵan. Karta sheńberinde buryn júzege asyrylǵan 51 jobanyń 43-i jobalyq qýatyna shyqty. Bul oraida qazirgi kezeńde jańa kásiporyndar ashý, shaǵyn jáne orta biznesti damytý esebinen 22 myńnan astam jańa jumys oryndary, sonyń ishinde memlekettik jáne salalyq baǵdarlamalar arqyly 14 myń jumys orny ashylǵan. Oblysta Nátijeli jumyspen qamtý jáne jappai kásipkerlikti damytý baǵdarlamasyna 42 myń jumyssyz jáne ózin ózi jumyspen qamtyǵan azamat tartyldy. Olardyń 20 myńǵa jýyǵy jumysqa ornalastyryldy, 8 myńnan astamy jańa jumysshy kásipterin meńgerýde. Taǵy 733 adam jalpy somasy 3,3 mlrd. teńgege jeke biznesin ashýǵa jáne keńeitýge múmkindik aldy.
