Almaty oblysynda tótenshe jaǵdai tártibin saqtamaǵan jeke jáne laýazymdy tulǵalar jaýapkershilikke tartyldy, dep habarlaidy "Ult aqparat".
Almaty oblysynyń tártip saqshylary tańǵa jaqyn, qarańǵylyqty paidalanyp saǵat 04:00-der shamasynda karantinge jabylǵan Almaty qalasynyń aýmaǵyna zańsyz ótpek bolǵan Ile aýdanynyń 30 jastaǵy turǵynyn ustady. Oǵan qatysty QR ÁQbK-niń 476-babyna sáikes ákimshilik hattama toltyrylyp, sot sheshimimen 10 táýlikke qamaldy.
Sonymen qatar, tártip saqshylary tótenshe jaǵdai kezinde qoiylǵan shekteýge qaramai, kásibin júrgizgen turǵyndardy jaýapqa tartty.
Oblys ortalyǵynda lotoreia klýby jumysyn toqtatpaǵan 27 jastaǵy turǵynǵa ákimshilik hattama toltyryldy. Sondai-aq, karantin ýaqytynda saǵat 20:00-den keiin saýdaǵa tyiym salynsa da, jabylmaǵan 4 saýda orny anyqtaldy. Al, Eńbekshiqazaq aýdanynyń 41 turǵynyna karantin tártibin buzyp, úiinen ketip qalǵany úshin 10 AEK mólsherinde aiyppul salyndy.
Óz kezeginde, oblystyq politseiler karantin ýaqytynda tártipti, sanitarlyq talapty qatań saqtaýǵa shaqyrady. Koronavirýs indetiniń jappai taralýynyń aldyn alý maqsatynda oblystaǵy barlyq qala-aýdandarda sanitarlyq beket qoiylýyna bailanysty saqtyq sharalaryna túsinistikpen qarap, talapty oryndaý qajettiligin eskertedi.
