Búgin Almaty oblys ákimi Amandyq Batalovtyń tóraǵalyǵymen orman, dala órtteriniń aldyn alý týraly jiyn ótti. Osy taqyrypqa bailanysty oblystyq tótenshe jaǵdailar departamentiniń bastyǵy, azamattyq qorǵanys polkovnigi Daryn Baisariev baiandama jasady, dep habarlaidy"Ult aqparat" oblys ákiminiń baspasóz qyzmetine silteme jasap.
Baiandamashynyń sózine súiensek, oblys aýmaǵynda 5 mln. gektardan astam jerdi memlekettik orman qory alyp jatyr. Onyń ishinde 1,9 mln. gektarǵa jýyǵy ormandy alqapty quraidy.
Jyl basynan beri 497,7 ga. jer aýmaǵynda 158 qurǵaq shóp janýy tirkelgen. Sonymen qatar memlekettik mekemelerdiń aýmaǵynda 2 orman órti oryn alǵan.
Memlekettik órtke qarsy bólimsheleri joq jerlerde 4749 jergilikti turǵyndy tarta otyryp, 361 erikti órt sóndirý jasaqtary qurylǵan. Olar barlyq qajetti tehnikamen qamtamasyz etildi. Sonymen qatar orman jáne dala órtterin joiý máselelerin shuǵyl sheshý maqsatynda Departamenttiń árbir bólimshesinde 39 shuǵyl mobildik toptar belgilengen. Garnizondyq jattyǵýlar turaqty túrde ótkizilip, órt sóndirý mashyqtary jetildirilýde.
Daryn Baisariev aýdan, qala ákimdikterin erikti órt sóndirý jasaqtary posttarynyń materialdyq bazasyn nyǵaitý, sýǵa túsý maýsymynyń bastalýyna bailanysty oqys oqiǵalardyń aldyn alý sharalaryna belsene qatysýǵa shaqyrdy.
Ekinshi bolyp minbege kóterilgen Tabiǵi resýrstar jáne tabiǵatty paidalanýdy retteý basqarmasynyń basshysy Kerimbek Janshabai mekemeniń orman órtine daiyndyǵynyń jaiyn habarlady.
K. Janshabaidyń aitýynsha, memlekettik orman sharýashylyǵy mekemeleriniń materialdyq-tehnikalyq jabdyqtalýy jaqsartylǵan. Búgingi kúni olarda 22 órt sóndirý avtokóligi, 20 sýtaratqysh, tirkemeli quraldarmen jabdyqtalǵan 22 traktor, 141 patrýldik avtokólik, 139 mototsiklmen qamtamasyz etilgen. Sonymen qatar órke qarsy quraldar da daiyndalǵan. Búgingi kúnge órt qaýipsizdigi erejesin saqtamaǵany úshin 9 azamat ákimshilik jaýapkershilikke tartylyp, orman sharýashylyǵyna kelgen 567,2 myń teńge shyǵyn tolyǵymen óndirildi.
Jiyndy qorytyndylaǵan oblys ákimi A. Batalov aýa raiynyń qatty ysyp turǵan qazirgi shaǵynda órt qaýipsizdigine, sýda shomylý qaýipsizdigine erekshe nazar aýdarý qajettigin aitty.
- Aýdan, qala ákimderi, ásirese, órtke qaýipti ýchaskelerdi nazardan tys qaldyrmaýlary kerek. Qajetti tehnikanyń barlyǵy tiisti normalarǵa sai bolsyn. Sýǵa túsý maýsymynda oqys oqiǵalardy boldyrmaý maqsatynda sýda qutqarý qyzmetiniń daiyndyǵy jiti bolýy tiis. Halyqty órt qaýipsizdiginen, sýdaǵy qaýipsizdik jaiynan turaqty habardar etip otyrý qajet. Tiisti orynbasarlaryma bul isti aýdan, qala ákimderi qalai atqaryp jatqanyn júieli túrde qadaǵalap otyrýdy tapsyramyn, - dedi A. Batalov.
