Almaty oblysyndaǵy 7552 áskeri bóliminiń sarbazy tún ishinde oqqa ushqan. Atylǵan 5 oqtyń úsheýi 21 jastaǵy Ertýǵan Omarhanovtyń basyna tiipti, qazir ol komada, dep habarlaidy KTK arnasy.
Ertýǵan Omarhanov – Shyǵys Qazaqstan oblysynyń týmasy, Zarechnyi kentindegi bólimge qarashada qabyldanypty. Al, mundaǵy sarbazdar kezekpen jaqyn jerdegi túrmeni kúzetedi. 2 kún buryn ol óz beketin tapsyrar kezde oqqa ushqan.
Túngi saǵat 1 shamasynda bolǵan oqys jaǵdaidyń mán-jaiyn qaiǵydan qan jutqan ata-ana áli de túsine alar emes.
"Ulym áskerge ketip, 3 aidan keiin myna jaǵdai bolyp jatyr. Bilmeimin ne bolǵanyn, túsiniksiz. Oq basyna, jaqtan kirip bastan shyqqan ǵoi", — deidi jábirlenýshiniń ákesi Erjan Ahmetov.
Oqtyń Ertýǵannyń qolyndaǵy Kalashnikov avtomatynan atylǵany belgili. Onyń úsheýi sarbazǵa dál tigen. Sondyqtan, dárigerler dereý ota jasapty. Soǵan qaramastan, jigittiń jaǵdaiy tym aýyr.
"Jaǵdaiy óte aýyr. Qazir komada jatyr. Biz qajetti em-domdy jasap jatyrmyz. Naýqas arnaiy apparatta", — dep málimet berdi Qapshaǵai qalalyq aýrýhanasy direktorynyń orynbasary Qairat Imanǵaliev.
Áskeri bólimdegi kameraǵa sarbazdyń avtomatty oqtap jatqany túsipti. Al, atylǵan sáti esh jerde joq. Sol kezde qasynda birneshe qarýlasy bolǵanymen, olar da mardymdy eshteńe aitpapty. Sondyqtan, qazir jumbaq jaǵdaidyń boljamdary ǵana bar.
Jaqyndary bolsa Ertýǵanǵa áskerde qysym kórsetilgen dep oilaidy. Sóitip, óz-ózine qol jumsaýǵa itermelegen bolýy múmkin. Óitkeni, buǵan deiin anasyna qońyraý shalǵanda, qinalyp júrgenin jetkizipti.
Al, áskeri bólimdegiler jas jigit oqty óz-ózine abaisyzda atyp alǵan dep topshylaidy.
"Bizdiń boljam boiynsha, qarý ustaý erejesin durys saqtamaǵan degen kúdikpen tergeý jumystaryn júrgizip jatyrmyz. Álimjettik faktileri tirkelgen joq", — deidi 7552 áskeri bólimi tárbie jáne áleýmettik quqyqtar bólimshesiniń bastyǵy Baǵlan Qaldybek.
Hál ústinde jatqan naýqasty qazir basqa aýrýhanaǵa aýystyrý múmkin emes. Jaraqat alǵan sarbazdyń jaqyndary prokýratýraǵa shaǵym túsirdi. Maqsattary – jigittiń oqqa ushýyna kinálilerdiń tiisti jazasyn tartqyzý.
