Foto: QR MAM
Halyq qaharmany, kórnekti mádeniet jáne óner qairatkeri, birtýar kompozitor Nurǵisa Tilendievtiń týǵanyna 100 jyl tolýyna orai týǵan jeri – Almaty oblysy Ótegen batyr aýylynda uly tulǵanyń eskertkishi boi kóterip, jańa mádeniet úii ashyldy, dep habarlaidy Ult.kz.
Saltanatty is-sharaǵa QR Mádeniet jáne aqparat ministri Aida Balaeva, Almaty oblysynyń ákimi Marat Sultanǵaziev, qoǵam jáne mádeniet qairatkerleri, ziialy qaýym ókilderi men óner maitalmandary qatysty.
El Prezidenti Qasym-Jomart Toqaev quttyqaý sózinde eskertkishtiń ashylýy halqymyzdyń áigili tulǵaǵa degen airyqsha qurmeti men ystyq yqylasynyń belgisi ekenin atap ótti.
«Nurǵisa Tilendiev órkenietimizdiń órisin keńeitýge ólsheýsiz úles qosty, elimizdiń mádeni murasyn jańǵyrtýǵa, qazaqtyń án-kúiin jer júzine tanytýǵa zor eńbek sińirdi. «Otyrar sazy» orkestriniń negizin qalap, ultymyzdyń rýhani dúnietanymyn baiyta tústi. Ol altyn qorymyzǵa engen pesalar men filmderge mýzyka jazyp, teatr jáne kino salasynda qaitalanbas qoltańbasyn qaldyrdy. Nurǵisa Tilendievtiń teńdessiz murasy áli talai urpaqqa taǵylym bereri sózsiz. Onyń esimi qazaq mádenietimen birge máńgi jasai beredi», – delingen quttyqtaý hatynda.
Memleket basshysynyń mereili sátke orai joldaǵan lebizin jetkizgen Aida Balaeva óz sózinde uly kompozitordyń qazaq mádenietine qosqan ólsheýsiz eńbegin erekshe atap ótti.
«Uly kompozitor halqymyzdyń tarihymen taǵdyryn, qýanyshy men qaiǵysyn, arman-muratyn ónermen órnektep, artynda mol mura qaldyrdy», – dedi A. Balaeva.
Foto: QR MAM
Ministr Nurǵisa Tilendievtiń 100 jyldyǵyna orai elimizde jáne shetelde aýqymdy mádeni is-sharalar uiymdastyrylyp jatqanyn sóz etti.
Atap aitsaq, TÚRKSOI halyqaralyq uiymy 2025 jyldy «Nurǵisa Tilendiev jyly» dep jariialap, Ankarada kórme, derekti film kórsetilimi men kompozitor shyǵarmalarynan kontsert ótkizdi. Parijdegi IýNESKO shtab-páterinde «Shabyt bastaýy» atty kórme ashylyp, AQSh-ta Karnegi-holda arnaiy ekspozitsiia, Beijińde «Qustar qaityp barady» atty shyǵarmashylyq kesh uiymdastyryldy. Sondai-aq Máskeý, Frankfýrt, Bishkek, Almaty jáne Túrkistan qalalarynda túrli kontsertter men festivalder ótti.
«Búgingi eskertkishtiń ashylýy da uly tulǵanyń rýhyn ulyqtaýǵa arnalǵan is-sharalardyń bir parasy dep bilemiz. Osynaý eńseli eskertkish – Nurǵisa Tilendievtiń ult júregindegi máńgilik ornyn aishyqtaidy. Nurǵisa Atabaiulynyń qundy qazynasy qazaqtyń máńgilik murasy bolyp qala bereri sózsiz», – dedi ministr.
Saltanatty jiynǵa qatysýshylar 400 oryndyq jańa mádeniet úiiniń ashylýyna qatysyp, kórme zaldaryn aralady. Is-shara aiasynda arnaiy kontsert ótip, dáýlesker kúishiniń ánderi men kúileri oryndaldy.
Aita keteiik, Nurǵisa Tilendievtiń músinin belgili músinshiler Aidos Búrkitbaev pen Timýr Ermuhametov jasaǵan. Qoladan quiylǵan eskertkishtiń biiktigi – 2,85 metr, tuǵyry – 1,5 metr, jalpy biiktigi – 4,35 metr. Tuǵyry granitten jasalǵan. Eńseli eskertkish – uly sazgerdiń ult rýhaniiatyna sińirgen eńbegine degen el qurmetiniń aiǵaǵy.
