Almaty oblysynda Mercedes-Benz 200 kóliginiń júrgizýshisi 11 jastaǵy jasóspirimdi qaǵyp ketti, - dep habarlaidy Tengrinews.kz.
Oqiǵa kýágerleri Qarasai aýdanyndaǵy aýyldardyń birinde bolǵan oqys oqiǵanyń videosyn jariialady. Kýágerlerdiń aitýynsha, balany mektepke barar jolda kólik qaǵyp ketken. Buǵan deiin bul joldyń qaýiptiligi týraly ata-analar mektepke, ákimdikke birneshe ret shaǵymdanǵan eken.
Almaty oblysy politsiiasynyń baspasóz qyzmeti bul aqparatty rastady. 14 sáýirde Qarasai aýdany Balaqty aýylynda Mercedes-Benz 200 kóliginiń 27 jastaǵy júrgizýshisi 11 jastaǵy jaiaý júrginshini qaǵyp ketken.
"Jetkinshek belgilenbegen jerden joldyń júrý bóligin kesip ótpek bolyp, sheteldik kólik astyna túskeni anyqtaldy. Bala jol-kólik oqiǵasy saldarynan jeńil jaraqat alyp, meditsinalyq tekserýden keiin ambýlatorlyq em qabyldaýǵa jiberildi", - dedi politsiia ókilderi.
Tártip saqshylary jol-kólik oqiǵasyna qatysty QR ÁQBtK-niń 610-baby 2-bóligi "Kólik quraldary júrgizýshileriniń jol júrisi qaǵidalaryn adamdardyń densaýlyǵyna ziian keltirýge, kólik quraldarynyń nemese ózge de múliktiń búlinýine alyp kelgen buzýshylyǵy" boiynsha hattama toltyrylǵanyn aitty.
Joldyń qaýipti bóligin patrýldik politsiia qyzmetkerleri baqylaýǵa alǵan.
