Almaty oblysynyń aýmaǵynda karantin sharalary kúsheitildi, dep habarlaidy "Ult aqparat" Coronavirus2020 Telegram paraqshasyna silteme jasap.
Oblystyń bas sanitar dárigeri Qairat Baimuhambetovtyń qaýlysyna sáikes, jańa shekteýler kúshine enedi.
Jinalystardy, keńesterdi, konferentsiialardy, forýmdardy, seminarlardy, sezderdi jáne adamdar kóp jinalatyn basqa da is-sharalardy ótkizýge tyiym salynady.
Qoǵamdyq tamaqtandyrý obektileriniń qyzmeti 30-dan astam otyratyn oryn-jailarda jáne 50-den astam otyratyn jazǵy alańdarda (onlain-tapsyrys uiymdastyrýdy jáne jetkizýdi qospaǵanda) toqtatyla turady.
Saýda, oiyn-saýyq ortalyqtarynyń, dini obektilerdiń, bilim berý ortalyqtarynyń, úiirmelerdiń, artklýbtardyń, balalardyń bos ýaqyty men qosymsha oqytý oryndarynyń, balalardyń túzetý kabinetteriniń jáne menshiktiń barlyq nysanyndaǵy mektepke deiingi uiymdardyń qyzmeti toqtatylady.
Statsionarlyq meditsinalyq kómek kórsetetin densaýlyq saqtaý obektilerinde josparly emdeýge jatqyzý, sondai-aq halyqty josparly immýndaýdy, júkti áielderdi qabyldaý men skriningti qospaǵanda, josparly meditsinalyq qyzmetterdi qabyldaý jáne kórsetý toqtatylady.
MSAK dárigerleriniń josparly qabyldaýy jáne ambýlatoriialyq-emhanalyq uiymdar dárigerleriniń josparly konsýltatsiialary qashyqtyqtan qyzmet kórsetý formatyna aýystyrylady.
HQKO, Open Taldyqorǵan servisi, biznes ortalyqtarynyń (saqtandyrý kompaniialary, esepshi jáne konsalting qyzmetteri, jyljymaityn múlik agenttigi, jarnama agenttikteri jáne basqa) jumysy onlain formatqa ótedi.
Onlain-formatta joq qyzmetterdi aldyn ala jazylyp, elektrondyq kezekpen saǵat 10:00-den 16:00-ge deiin ala alasyz.
