Almaty oblysynyń politseileri UQK qyzmetkerlerimen birlese otyryp, qańtardaǵy jappai tártipsizdikti uiymdastyryp, oǵan qatysty degen 11 kúdiktini anyqtap, ustady, - dep habarlaidy Tengrinews.kz tilshisi oblystyq Politsiia departamentine silteme jasap.
Vedomstvo málimetinshe, 20-39 jas aralyǵyndaǵy kúdiktiler oblystyń ár aýdanynda ustalǵan. Olardan buryn tártip saqshylarynan urlanǵan atys qarýy, arnaiy qorǵanys quraldary men oq-dáriler tárkilengen.
"Tintý kezinde kúdiktilerden eki tegis uńǵyly ańshy myltyǵy, kóptegen oq-dári, quqyq qorǵaý jáne qaýipsizdik sharalarynda qoldanylatyn politsiianyń oq ótkizbeitin keýdesheleri jáne arnaiy quraldar tárkilendi. Tárkilengen qarý-jaraq pen múlik buryn qalalyq jáne oblystyq politsiia ǵimarattaryna shabýyl jasaý kezinde urlanǵan quraldar esebinde", - dedi Almaty oblysy PD baspasóz qyzmeti ókilderi.
Jedel izdestirý sharalary barysynda uiymdasqan qylmystyq toptyń belsendi múshesi Sarqan aýdanynyń 37 jastaǵy turǵyny ustalǵan.
"Jeke tintý kezinde odan "Makarov" tapanshasy, oǵan arnalǵan oq-dári jáne gashishke uqsas erekshe iisi bar, salmaǵy 210 gramm jasyl tústi zattyń bir býmasy tárkilendi. Qarý men oq-dárilerdi, sondai-aq esirtki quraldaryn zańsyz saqtaǵany úshin qylmystyq jáne ákimshilik jaýapkershilik qarastyrylǵan.
Taǵy bir aita keterligi, ustalǵan azamattyń týystary Politsiia departamenti ǵimaratyna basyp kirip, tergeý barysyna kedergi keltirmek bolǵan", - dep tolyqtyrdy politseiler.
Ustalǵandar video arqyly rastalyp otyrǵany aityldy. Beinebaqylaý kameralaryna kúdiktilerdiń oblys ákimdigi men qalalyq politsiia ǵimarattaryn basyp alýǵa qalai qatysqany, sondai-aq tártip saqshylary men áskeri qyzmetkerlerge kúsh qoldanǵany túsip qalǵan.
"Ustalǵandarǵa qatysty Qylmystyq kodekstiń 272-baby "Jappai tártipsizdikke qatysý" boiynsha tergelip jatyr. Jinalǵan material dáleldemelik bazamen birge arnaiy prokýratýra qyzmetkerleri óndirisine jiberildi", - dep qorytyndylady departamenttegiler.
