foto: Tengrinews.kz
Almaty oblysyndaǵy aýyl turǵyndary er adamnyń órtenip ketken máiitin tapqan. Politseiler kúdiktilerdiń jábirlenýshiniń páterin iemdený maqsatynda ony óltirgenin anyqtady, - dep habarlaidy Tengrinews.kz agenttigi "Astana" telearnasyna silteme jasap.
Er adamnyń órtenip ketken denesin Almaty oblysynyń Qarakemer aýyly mańynda jergilikti turǵyndar kezdeisoq taýyp alǵan. Máiit aýyl mańynda bir aiǵa jýyq jatqan.
Keiinirek tergeýshiler 48 jastaǵy er adam óltirilgenin anyqtady. Sot sarapshylarynyń derekteri boiynsha, er adam eki ret pyshaqtalǵannan keiin qaitys bolǵan. Marqum 25 naýryzda joǵalyp, sodan beri habar-osharsyz ketken. Politsiia qyzmetkerleri onyń denesi tabylǵannan keiin birden qaskúnemderdiń izine túsken. Eńbekshiqazaq aýdanynyń úsh turǵyny kisi óltirdi degen kúdikke ilingen: eki er adam men áiel adam. Olardyń úlkeni - 33 jasta, kishisi - 23 jasta. Olar jasaǵan isin moiyndaǵan kezde mundai áreketke paida tabý úshin barǵanyn aitqan.
"Kúdiktiler Almatydaǵy páterdi iemdený maqsatynda kisi óltirgenin aitty. Er adam jalǵyz turǵan, ishimdik kóp ishken. Kúdiktiler osyny paidalanǵan. Qylmys Almaty aýmaǵynda jasalǵan. Sodan keiin máiitti jalǵa alynǵan kólikpen Eńbekshiqazaq aýdanyna aparyp, órtep jiberýge tyrysqan", - dedi Almaty oblysy PD baspasóz qyzmetiniń ókili Ábiltai Ábenov.
Qazir kúdiktilerdiń úsheýi de ustaldy. "Adam óltirý" baby boiynsha sotaldy tergeý bastaldy. Olar 20 jylǵa deiin bas bostandyǵynan aiyrylýy múmkin.
