© Sputnik / Sergei Malgavko
Almaty oblysynyń Qainazar aýylynda elektr jaryǵy jii óship qalady. Jel tursa boldy, turǵyndardyń mazasy ketedi, dep habarlaidy Sputnik Qazaqstan.
"Keshe elektr jaryǵy 5 ret óshti. Saqalymdy alyp turǵan edim. Sol kúii ala almadym. Beredi, óshiredi. Boran bolsa bir sári. Óte jii óshiredi. Óshpegenniń ózinde qýaty óte álsiz. Úi qarańǵy", - deidi Omarqajy Shaqaev.
Qainazar – Jambyl aýdanyndaǵy jarty ǵasyrdan astam tarihy bar aýyl. Buryn shaǵyn bolǵanymen qazir irgesi keńigen, 6500 adam turady. Qonystanýshylar kóp.
"Jańa qonystanyp jatqan jaqta tsement baǵanalar ornatylǵan. Al myna eski Qainazarda elektr baǵanalary men symdar 1968 jyldan beri jańartylmaǵan. Tipti elektr symdary da jii úziledi. Mamandar ony jalǵaýmen ǵana keledi", - deidi Keńshilik Omarov (aty-jóni ózgertildi).
Al aýyl ákiminiń ýáji múldem basqa. Aitýynsha, elektr jaryǵy kúnine 5 ret óshpeidi. Apattyq jaǵdai bolǵan kezde jóndeý jumystary ýaqytyly júrgiziledi.
"Al elektrshiler aǵash kesetin kezde nemese jóndeý jumystaryna bainalysty óshiretin bolsa, ákimshilik tarapynan halyqqa áleýmettik jeli jáne aýyldyń vatsap chattary arqyly habarlandyrý berilip otyrady", - deidi Qainazar aýylynyń ákimi Nurjan Qanaǵatuly.
Jergilikti biliktiń aitýynsha, elektr baǵandaryn jańartý úshin qarajat bólingen, jobalyq smetalyq qujattary daiyn. 2023 jyldyń basynan atalǵan joba júzege asa bastaidy.
