Elimizde Memleket basshysynyń tapsyrmalaryna sáikes, otandyq dárilik zattar óndirisiniń úlesin arttyrýǵa baǵyttalǵan jobalardy júzege asyrý jalǵasyp jatyr, dep habarlaidy ult.kz.
Atalǵan jumys aiasynda Qazaqstan Respýblikasynyń Úkimeti Densaýlyq saqtaý ministrligi men «Steppe pharmaceuticals» JShS arasynda jasalǵan Almaty oblysyndaǵy «Alataý» AEA aýmaǵynda tolyq tsikldi biofarmatsevtikalyq keshen salý jónindegi investitsiialar týraly kelisimdi maquldady. Premer-ministr Oljas Bektenov tiisti qaýlyǵa qol qoidy.
Jeke investitsiialardyń jalpy kólemi 32,5 mlrd teńgeni quraidy. Jańa óndiris joǵary tehnologiialyq óndiristik qýattardy lokalizatsiialaýǵa jáne damytýǵa baǵyttalǵan. Farmatsevtikalyq zaýyt dárilik preparattyń 20 túrin shyǵarýdy josparlap otyr. Olardyń qatarynda onkologiialyq jáne sirek kezdesetin aýrýlardy emdeýge arnalǵan dáriler, sondai-aq zamanaýi immýnobiologiialyq preparattar bar. Kásiporyndy iske qosý 2031 jylǵa, jobalyq qýatqa shyǵý 2032 jylǵa, al negizgi baǵyttar boiynsha tolyq tsiklge kóshý 2034 jylǵa josparlanǵan.
Dári-dármek óndirý men sertifikattaýdan bólek, ǵylymi-zertteý jáne tájiribelik-konstrýktorlyq jumystar da qarastyrylǵan. Óziniń R&D baǵytyn damytý, onyń ishinde bioekvivalenttilik zertteýlerin júrgizý, tirkeý qujattaryn daiyndaý jáne halyqaralyq GMP standarttaryn engizý josparlanǵan. Budan bólek, keshen bazasynda qazaqstandyq mamandardy oqytý jáne biliktiligin arttyrý júiesi qurylady.
Jobany júzege asyrý eldiń dárilik qaýipsizdigin nyǵaitýǵa jáne Almaty oblysy aýmaǵynda zamanaýi farmatsevtikalyq óndiris infraqurylymyn qalyptastyrýǵa múmkindik beredi. Shamamen 60 jańa jumys orny ashylady.
Jalpy qazirgi tańda elde farmatsevtikalyq óndiris salasynda 8 iri investitsiialyq joba júzege asyrylyp jatyr. Farmatsevtika salasy oń dinamika kórsetip otyr. Ótken jyldyń qorytyndysy boiynsha otandyq farmatsevtikalyq ónim óndirisiniń kólemi 191,1 mlrd teńgege jetip, 2024 jylmen salystyrǵanda 8,7%-ǵa ósken. Salaǵa tartylǵan jalpy investitsiia kólemi 390 mlrd teńgeden asty.
Almaty oblysynda salynatyn bul keshen importqa táýeldilikti azaityp, qazaqstandyqtardy sapaly ári ómirlik mańyzdy dári-dármekpen qamtamasyz etýge múmkindik beretin mańyzdy jobalardyń biri bolmaq.
