Búgin Tatarstan Respýblikasynyń Prezidenti Rýstam Minnihanov jumys saparymen Almaty oblysyna kelip, oblys ákimi Amandyq Batalovpen resmi kezdesý ótkizdi, - dep habarlaidy Almaty oblysy ákiminiń baspasóz qyzmeti.
Oblys ákimdiginiń foiesinde oblys ekonomikasynyń basym baǵyttary men Taldyqorǵan qalasyn damytýdyń Bas jospary kórsetilgen stendter ornatyldy. Resmi delegatsiiaǵa oblys aýmaǵynda júzege asyrylyp jatqan agro-ónerkásiptik keshendi damytý, indýstrialandyrý, investitsiia tartýdyń negizgi kórsetkishteri jáne óńirdi damytý baǵdarlamasynyń oryndalý barysy tanystyryldy.
Kezdesýdi oblys ákimi Amandyq Batalov ashty. Resmi delegatsiiany tanystyrǵannan keiin, óńir basshysy Almaty oblysyna kelý týraly usynysyn qabyl alǵany úshin Tatarstan Respýblikasynyń Prezidenti Rýstam Minnihanovqa alǵysyn bildirdi.
- Bizben yntymaqtastyq qurý týraly bildirgen nietimizdi qabyl alǵandaryńyz bizdi qatty qýantady. Biz Sizderden ónerkásipti damytý, jańa tehnologiialardy engizý turǵysyndaǵy tájiribelerińizdi ózimizde qoldanǵymyz keledi. Qant qyzylshasyn ósirýdi jańǵyrtý - Jetisý ólkesi úshin basym baǵyttardyń biri bolǵandyqtan, osy baǵytta biz jumyla jumys júrgizýdemiz. Sol sebepti sizderdiń osy baǵyttaǵy tájiribelerińiz ben tehnologiialaryńyz bizdi qyzyqtyratyndyǵy anyq. Sondai-aq, Memleket basshysy Nursultan Ábishuly Nazarbaevtyń tapsyrmasy boiynsha qurylǵan «Qorǵas – Shyǵys qaqpasy» arnaiy ekonomikalyq aimaǵy (AEA) men «Qorǵas» shekara mańy yntymaqtastyǵynyń Halyqaralyq ortalyǵy (ShYHO) arqyly «Qurǵaq port» transulttyq jobasynyń múmkinshilikterine negizdelip, Tatarstan men Almaty oblysynyń kásipkerleri arasynda áriptestiktiń tyǵyz bailanysyn ornatqymyz keledi. Taǵy bir atap ótýge turarlyq másele – bizdiń óńirimizde barlyq qajetti infraqurylymy júrgizilgen indýstrialdy aimaqtar bar. Bul da biznesti damytý men investitsiia tartýǵa septigin tigizer igi isimiz, - dedi A. Batalov.
Osydan keiin sóz alǵan Tatarstan Respýblikasynyń Prezidenti Rýstam Minnihanov shaqyrý usynǵany úshin óńir basshysy Amandyq Ǵabbasulyna alǵysyn bildirip, eki jaqty tiimdi áriptestik qurý máselelerine toqtaldy.
- Biz «Qorǵas» ShYHO men «Qorǵas – Shyǵys qaqpasy» AEA nysandarynyń múmkindikterimen tanysýǵa úlken qyzyǵýshylyq tanytýdamyz. Biz úshin erkin ekonomikalyq aimaqtyń jumysymen tanysý, qandai baǵyttar boiynsha birlesip jumystar júrgizýge bolatyndyǵyn anyqtaý, otandyq ónimderimizdi Qazaqstan aýmaǵy arqyly ózge memleketterge ótkizý múmkindikterin qarastyrý mańyzdy bolyp tur. Almaty oblysynda memlekettik – jekemenshik áriptestik negizinde kóptegen balabaqshalardyń ashylyp jatqandyǵyn erekshe atap ótkim keledi. Bul tájiribelerińiz bizderdi qyzyqtyrdy. Odan bólek, Jetisý óńiri maiburshaq pen júgeri óndirý boiynsha aldyńǵy qatarda ekendigin eskersek, biz úshin osy ónimderdi ósirýdegi sizderdiń tájiribelerińiz qajet. Jalpy Tatarstan men Almaty oblysy arasynda aýylsharýashylyǵy baǵytynda joldary qiylysar tustardyń óte kóp ekendigin jáne ony qos tarapqa da tiimdi paidalanýǵa bolatyndyǵyn baiqadym. Jetisýdyń ásem tabiǵatyn aitpai ketpeske bolmas. Sizderdiń tabiǵi-klimattyq jaǵdailaryńyz básekelesterińizdiń aldynda sizderge basymdyq beretini sózsiz, - dep atap ótti Rýstam Minnihanov.
Ózara tiimdi yntymaqtastyq múmkindikterin talqylaǵannan keiin, qos tarap kezdesýdi Til saraiynda jalǵastyrdy. Onda Tatarstan Prezidenti Almaty oblysynyń tatar etnomádeni ortalyǵynyń ókilderimen kezdesti. Kezdesýdiń erekshe sáti dep Tatarstan Prezidentiniń oblys ákimi Amandyq Batalovqa Árip Táńirbergenniń «Birjan Sal men Aqyn Sara aitysy» atty qoljazbasynyń kóshirmesin tabystaýyn atap ótýge bolady. Osylaisha qazaqstandyq tatar qaýymdastyǵynyń erterekte aitylǵan amanaty oryndaldy.
Kezdesý sońynda resmi delegatsiia Panfilov aýdanyna jol tartyp, onda «Qorǵas – Shyǵys qaqpasy» arnaiy ekonomikalyq aimaǵy (AEA) men «Qorǵas» shekara mańy yntymaqtastyǵynyń Halyqaralyq ortalyǵy (ShYHO) nysandaryn kórip qaitty.
