Sankt-Peterbor úkimetiniń múshesi – ultaralyq qatynastar jáne kóshi-qon saiasatyn iske asyrý komitetiniń tóraǵasy Oleg Kapitanov bastaǵan reseilik delegatsiia mádeni-iskerlik missiiamen Almatyǵa keldi, dep habarlaidy "Ult aqparat".
Sankt-Peterbordan kelgen delegatsiiany Almaty ákimi Baqytjan Saǵyntaev qabyldady. Shahar basshysy Oleg Kapitanovpen eki qala arasyndaǵy qarym-qatynasty damytý perspektivalaryn talqylady. Taraptar densaýlyq saqtaý, bilim, týrizm, mádeniet jáne ShOB salalarynda yntymaqtastyqtyń «Jol kartasyn» ázirleýge kelisti.
Sonymen qatar, delegatsiia «Almaty-Sankt Peterbor: jańa múmkindikter aýmaǵy» konferentsiiasyna qatysty.
Jiyn barysynda Almaty qalasy ákiminiń orynbasary Erjan Babaqumarov, «bul basqosýdyń Almaty men Sankt-Peterbor arasyndaǵy mádeni qarym-qatynasty damytýǵa oń yqpal etetindigin» atap ótti.
«Almaty men Sankt-Peterbor kórshilik qarym-qatynasty nyǵaitýda úlken ról atqarady. Bizdiń eki qalamyz tarihi turǵyda birine-biri uqsas jáne shyn máninde óz elderiniń mádeni jáne iskerlik ortalyqtary bolyp sanalady.
Aitar bolsaq, Almaty men Sankt-Peterbor arasyndaǵy baýyrmaldyq qatynasqa 20 jyldan astam ýaqyt ótti. Biz búgin yntymaqtastyqty odan ári jalǵastyrýǵa jańa serpin beretin bolamyz», - dep atap ótti Erjan Babaqumarov.
Óz kezeginde, Almatydaǵy Resei Federatsiiasynyń Bas konsýly Evgenii Bobrov Qazaqstan men Reseidiń birlesken jumysty odan ári jandandyrýy qajettigin aitty.
«Bizdiń eki memleketimiz tek strategiialyq odaqtastar ǵana emes, sonymen qatar teń turǵydaǵy seriktester. Rasynda da bizdiń ortaq ári óte bai tarihymyz bar. Bizdiń basty mindetimiz - ata-babalarymyzdan qalǵan barlyq qundylyqtardy saqtap qana qoimai, olardy baiytý jáne ózara bailanysymyzdy jaqsartý», - dedi Evgenii Bobrov.
Onyń aitýynsha, 2018 jyly Resei men Almaty arasyndaǵy taýar ainalymy 4,7 mlrd dollardy quraǵan.
Konferentsiia barysynda Sankt-Peterbor úkimetiniń múshesi – ultaralyq qatynastar jáne kóshi-qon saiasatyn iske asyrý komitetiniń tóraǵasy Oleg Kapitanov Almaty men Sankt-Peterbordyń birdei tuǵyrly alańda turǵanyn atap ótti.
«Bizdiń delegatsiianyń quramynda mádeni qaýymdastyqtyń, bilim men ǵylym salasynyń ókilderi, biznesmender bar. Almatyǵa Sankt-Peterbordyń eń ozyq kompaniialary keldi. Basty maqsat - tek mádeni-tanymdyq ǵana emes, sonymen qatar bizneste, bilim men gýmanitarlyq jobalarda uzaq merzimdi ári eki jaqqa da paidaly shynaiy praktikalyq bailanystardy ornatý», - dep atap ótti O. Kapitanov.
Sankt-Peterbordyń delegattary Almaty ákiminiń kásibi basqarmalary basshylarymen saýda-ekonomikalyq yntymaqtastyq áleýetin, ózara bailanys pen mektep jasyna deiingi, jalpy, qosymsha jáne kásibi bilim berý júielerindegi birlesken jobalardy iske asyrýdy talqylady. Budan ózge, kún tártibine gýmanitarlyq yntymaqtastyqtyń, sonyń ishinde mádeniet jáne týrizm salalaryndaǵy seriktestiktiń áleýetti máseleleri engizildi.
Shara aiasynda Sankt-Peterbor týraly ádebietti QR Ulttyq kitaphanasyna saltanatty túrde tapsyrý rásimi jáne «Kvintet Chetyreh» mýzykalyq ujymy men Mariinsk teatrynyń solisi Leonid Zahojaevtyń merekelik kontserti ótti.
