QR Premer-Ministri Asqar Maminniń tóraǵalyǵymen QR Prezidenti janyndaǵy Tótenshe jaǵdai rejimin qamtamasyz etý jónindegi memlekettik komissiianyń selektorlyq otyrysy ótti, dep jazady primeminister.kz.
Elimizdegi sanitarlyq-epidemiologiialyq jaǵdai týraly densaýlyq saqtaý ministri E. Birtanov, óńirlerdegi ahýal týraly Nur-Sultan qalasynyń ákimi A. Kólginov, Almaty qalasynyń ákimi B. Saǵyntaev, Shymkent qalasynyń ákimi M. Áitenov, sondai-aq Qyzylorda oblysynyń ákimi G. Ábdiqalyqova, Jumyspen qamtýdyń jol kartasyn is júzine asyrý sharalary týraly eńbek jáne halyqty áleýmettik qorǵaý ministri B. Nurymbetov, Jambyl oblysynyń ákimi B. Saparbaev pen Qaraǵandy oblysynyń ákimi J. Qasymbek, aýmaqtyq áskerlerdi arnaýly jinaqtaý týraly qorǵanys ministri N. Ermekbaev baiandady.
Memlekettik komissiia koronavirýs infektsiiasynyń taralýyn shekteý maqsatynda qyzmeti eki megapolistiń tirshilik áreketin qamtamasyz etýmen jáne turǵyndardyń densaýlyǵymen bailanysty uiymdardy qospaǵanda, barlyq kásiporyndar men uiymdar úshin Nur-Sultan jáne Almaty qalalarynda kúshine engen jumyssyz rejimdi osy jyldyń 13 sáýirine deiin uzartý týraly sheshim qabyldady.
Memlekettik komissiia Shymkent qalasy ákiminiń biylǵy 4 sáýir kúngi saǵat 21:00-den bastap qalada karantin engizý týraly usynysymen kelisti.
Aýrýhanaishilik juqpaly aýrýlardyń aldyn alý maqsatynda Úkimet basshysy ákimderge infektsiialyq, provizorlyq jáne karantindik nysandardaǵy sanitarlyq talaptardyń múltiksiz saqtalýyn qamtamasyz etýdi tapsyrdy.
Densaýlyq saqtaý ministrliginiń usynysy boiynsha Nur-Sultan, Almaty jáne Shymkent qalalarynda tez turǵyzylatyn qurylymdardan úsh juqpaly aýrýlar aýrýhanalaryn salý týraly sheshim qabyldandy.
Indýstriia jáne infraqurylymdyq damý ministrligine múddeli memlekettik organdarmen birlesip, TJ kezeńinde jeke qorǵanysh quraldaryn shyǵarýǵa baqylaýdy qamtamasyz etý boiynsha qajetti sharalardy qabyldaý, Densaýlyq saqtaý ministrligi men ákimdikterge tirshilikti qamtamasyz etý obektilerinde qaýipsizdik pen jumys isteýdiń jekelegen algoritmin ázirleý tapsyryldy.
Otyrys barysynda Jumyspen qamtýdyń jol kartasyn (JQJK) sapaly júzege asyrý, onyń ishinde Nur-Sultan, Almaty, Shymkent qalalary men basqa da óńirlerde naqty jobalardy tez arada bastaý máselelerine erekshe nazar aýdaryldy. Oǵan qosa Úkimet basshysy ákimderge kem degende 240 myń jumys ornyn qurýdy, otandyq óndirýshilerdiń taýarlary men qyzmetteriniń keminde 90%-yn paidalanýdy qamtamasyz etýdi, JQJK aiasynda jumysqa ornalastyrý úshin mobildi rekrýt pýnktterin qurýdy, jumyssyzdardy jobalarǵa Elektrondyq eńbek birjasy arqyly tartýdy tapsyrdy.
Premer-Ministr tótenshe jaǵdai kezinde tabysynan aiyrylǵandardyń tólem alýy (42 500 teńge) úshin azamattarǵa esepshot ashý jumystaryn qamtamasyz etý qajettigin atap ótti.
Memlekettik komissiia mektep oqýshylarynyń tórtinshi toqsanda qashyqtan oqý máselesin qarastyrdy.
«Bilim jáne tsifrlyq damý ministrlikterine qashyqtan oqytý protsesine monitoring júrgizip, ádistemelik qoldaý kórsetýdi tapsyramyn», — dedi A. Mamin.
Azyq-túlik qaýipsizdigin qamtamasyz etý jáne áskeri mindettilerdi Qarýly kúshterdiń aýmaqtyq áskerlerin jasaqtaý úshin arnaýly jiyndarǵa shaqyrý máseleleri, sondai-aq ekonomikanyń sektorlarynda tótenshe jaǵdaidyń engizilýine bailanysty asa zardap shekkenderdi Qyzmet túrleriniń tizimine engizý úshin qajetti usynystar qaraldy, olar 1 sáýirden 1 qazan aralyǵynda eńbekaqy tóleý qorynan salyqtar men basqa da mindetti tólemderdi tóleýden bosatylady.
