Almatyda qazaqstandyq tanymal sportshy Denis Tendi aqtyq saparǵa shyǵaryp saldy. Qylmysker pyshaǵynan ajal qushqan ónerli jigitpen qoshtasýǵa Almaty men Astanadaǵy qaraly jiyndarǵa myńdaǵan adam jinaldy.
Denis Tenmen qoshtasý rásimi ótken Almatydaǵy Balýan Sholaq atyndaǵy sport saraiyna senbi kúni kelgen adamdardyń qarasy kóp boldy. Jinalǵandardyń arasynda Qazaqstannyń sport, mádeniet jáne óner qairatkerleri, marqumnyń dos-jarandary, resmi tulǵalar, BAQ ókilderi men qarapaiym adamdar bar.
Olar Almatynyń ortalyǵynda qylmysker pyshaǵynan 25 jasynda qapyda qaza tapqan ónerli jigittiń týǵan-týystaryna kóńil aityp, tabyt aldyna gúl qoiyp, marqumǵa sońǵy ret qurmet kórsetti.
Balýan Sholaq atyndaǵy sport saraiynda ótken qaraly jiyndy Almaty qalasy qoǵamdyq keńesiniń tóraǵasy Rahman Alshanov júrgizdi. Mádeniet jáne sport ministri Arystanbek Muhamediuly qazaqstandyq tanymal sportshy Denis Tenniń mezgilsiz qazasyna bailanysty Qazaqstan prezidenti Nursultan Nazarbaevtyń joldaǵan kóńil aitý jedelhatyn oqyp berdi.
Budan soń aza tutý jiynynda sóilegen Almaty qalasy ákiminiń orynbasary Sultanbek Mákejanov, Olimpiada chempiony atanǵan qazaqstandyq sport juldyzdary Jaqsylyq Úshkempirov pen Serik Sápiev, Dmitrii Balandin, Qazaqstan Ulttyq konkishiler federatsiiasynyń jetekshisi Bolat Jámishevter, tanymal tennisshi Zarina Diias sekildi tulǵalar Denis Tenniń Qazaqstan sportyna qosqan úlesi men jarqyn beinesi halynyń jadynda máńgi qalatynyn aitty.
Almatydaǵy Denis Tenmen qoshtasý rásimine Los-Andjelesten arnaiy belgili qazaqstandyq kásipqoi boksshy Gennadii Golovkin de keldi. Gennadii Golovkin osy shara úshin Saýl Alvarespen bolatyn kezdesýine daiyndyqty tastap shyqqan.
Astana qalasynda azaly shara "Barys-Arena" sport kesheninde ótti. Oǵan qazaqstandyq tanymal sportshylar, depýtattar men sheneýnikter, qarapaiym azamattar jinaldy.
Qoshtasý rásimi "Barys Arenada" saǵat onda bastaldy. Qaraly jiynǵa Astana ákiminiń orynbasary Ermek Amanshaev, aqparat jáne kommýnikatsiialar ministri Dáýren Abaev, bokshy Daniiar Eleýsinov, Koreia men Japoniia elshileri qatysty.
Amanshaev Astana ákimdigi atynan Denis Tenniń ata-analaryna, jaqyndary men týǵandaryna kóńil aitty.
"Denis baýyrymnyń Qazaqstan sportynda orny da jóni de bólek. Jas bolǵanymen qaramastan, halyqaralyq týrnirlerdiń alǵashqy jalǵyz júldegeri boldy. Óte talantty sportshy, álemdik mánerlep syrǵanaýdyń juldyzy bolatyn. Onyń orny árdaiym oisyrap turady. Jatqan jeri jaily, topyraǵy torqa bolsyn", — dedi ákim orynbasary.
"Osyndai qaiǵyly kúnde sóz taýyp aitý qiyn. Eń aldymen, ata-anasyna, jaqyndaryna qaiǵyryp kóńil aitamyn. Bul tragediia bárimizge sabaq…Keshir jáne qosh bol, Denis", — dedi ministr Abaev.
«Ajal aityp kelmeidi degen qazaqtyń sózi bar. Biz Denisti qorǵai almadyq, saqtai almadyq. Qanisherler ustalǵanymen, súiikti ulymyz Denis aramyzǵa qaityp kelmeidi. Denis sporttyq jetistikterimen ǵana emes, adami qasietterimen, óziniń kishipeiildiligimen, kópshildigimen barshamyzdyń júregimizden oryn aldy. Jatqan jeri jaily bolsyn», - dep kóńil aitty qazaqstandyq sport kommentatory Dias Ahmetshárip.
Qoshtasý rásimine kelgender sportshynyń sýreti beinelengen banner aldyna gúl shoqtaryn qoiyp, sportshyny bir minýt únsizdikpen eske aldy.
Qyrshyn ketken jas Almatyda 1993 jyly 13 maýsymda dúniege keldi. Ol - Koreiada japon otarlaýshylaryna qarsy soǵysqan general Min Gyn Honyń urpaǵy. Denis Ten balalyq shaǵynda mýzyka, tennis, akrobatika, karate, sýda júzýmen ainalysyp, túptep kelgende, mánerlep syrǵanaýdy tańdady.
Denis Ten Qazaqstannyń mánerlep syrǵanaý sporty tarihynda jańa paraqtar jazdy. Los-Andjeleste ótken 2009 jylǵy álem chempionatynda úzdik ondyqtyń qataryna enip, segizinshi orynǵa ie boldy. Osylaisha ol Vankýver Olimpiadasyna Qazaqstanǵa qos birdei joldama alyp berdi. 2010 jylǵy Olimpiadada eń jas qatysýshy bolǵanyna qaramastan, 11-inshi orynnan kórindi. Bul aldaǵy jarqyn jeńisterdiń basy edi.
2011 jyldyń aqpanynda Qazaqstanda ótken VII qysqy Aziia oiyndarynda Denis Ten altyn júldeni jeńip aldy. Eki jyldan keiin Kanadada ótken álem chempionatynda D.Ten óziniń jeke rekordy - 266,48 balǵa qol jetkizdi. Erkin baǵdarlamada úzdik shyqqan ol qorytyndyda kanadalyq Patrik Channan nebári 1,3 balǵa qalyp qoiyp, kúmis júldeni enshiledi. Sóitip qazaqstandyq mánerlep syrǵanaýshylar arasynda alǵash ret álem chempionatynyń júldegeri atandy. Denistiń sporttyq jolyndaǵy basty jetistigi, árine, Sochi Olimpiadasyndaǵy qola medal edi.
Bul sol dodadaǵy Qazaqstan qorjynyndaǵy jalǵyz júlde bolatyn ári táýelsiz el tarihynda mánerlep syrǵanaýdan alynǵan birinshi medal edi. «Qurmet» ordeniniń jáne memlekettik «Daryn» jastar syilyǵynyń iegeri Denis Tenniń budan basqa da tabystarǵa qol jetkizýine jaraqattary múmkindik bermedi. 25 jyl ǵumyrynda ómirden ozǵan sportshynyń bolashaǵy alda edi. Qansha biikke kóterilse de, óziniń kishipeiil minezinen, súikimdi qalpynan tanbai, halqynyń qoshemetine bólengen Denis Tenniń jarqyn beinesi el jadynan máńgi óshpeitini anyq.
Aita ketsek, Qazaqstandyq mánerlep syrǵanaýshy Denis Ten 19 shilde kúni pyshaq jaraqatynan qaza bolǵan edi. Oqiǵa Qurmanǵazy Baiseiitova kósheleriniń qiylysynda 19 shildede túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
Adam óltirý babymen qylmystyq is qozǵaldy.
