Shyǵys Qazaqstan oblysynyń Kúrshim aýdanynda mas kúiinde kólik basqarǵan 39 jastaǵy er adam qaita ustaldy. Ol buǵan deiin de osy quqyqbuzýshylyǵy úshin jaýapqa tartylyp, jeti jylǵa júrgizýshi kýáliginen aiyrylǵan, dep habarlaidy ult.kz.
Politsiia qyzmetkerleri Abai kóshesinde Toyota Camry Gracia avtokóligin toqtatqan. Meditsinalyq kýálandyrý júrgizýshiniń ortasha dárejede alkogoldik masań kúide bolǵanyn rastady.
Tekserý barysynda er adamnyń 2020 jyly da mas kúiinde kólik basqarǵany úshin ákimshilik jaýapkershilikke tartylǵany anyqtaldy. Sol kezde sot ony jeti jylǵa kólik júrgizý quqyǵynan aiyrǵan.
Alaida sot sheshimine qaramastan, ol qaitadan mas kúiinde rólge otyrǵan. Qazir júrgizýshige qatysty qylmystyq is qozǵalyp, materialdar sotqa joldandy. Kúdikti ýaqytsha ustaý izoliatoryna qamaldy.
