Almatynyń bas sanitarlyq dárigeri Jandarbek Bekshin oqýshylarǵa oflain rejimde oqý múmkindigin qamtamasyz etý úshin qabyldanyp jatqan sharalar týraly aityp berdi, dep habarlaidy QazAqparat.
«Biz Memleket basshysynyń oqýshylar oflain jaǵdaida oqýy tiis degen tapsyrmasyn oryndaýdy kózdep otyrmyz. Bul úshin oqýshylarǵa qaýipsiz jaǵdai jasaýymyz kerek. Biz osy baǵytta jumys istep jatyrmyz», - dep atap ótti Bekshin onlain brifingte.
Bekshin eń aldymen, megapolistiń barlyq mektepterine «Ashyq» jobasy engizilip jatqanyn aitty. Bul KVI juqtyrǵan nemese onymen bailanysta bolǵan adamdardy oqý oryndaryna jibermeý úshin jasalady. Qazirgi ýaqytta «Atameken» aýmaqtyq palatasynyń habarlaýynsha, mektepter men mektepke deiingi mekemelerdiń 100% QR-kod aldy jáne 1 qyrkúiekten bastap «Ashyq» boiynsha jumys isteýge daiyn.
«Ekinshi qorǵaný jelisi – oqýshylar kóp jinalatyn oryndarda, ashanalarda, sanitarlyq toraptarda – retsirkýliatorlar engizý. Biz bul máseleni mektep ákimshiligimen qarastyryp, ata-analar komitetterimen talqylaimyz. Úshinshi joly – synyptarda aýany zararsyzdandyratyn dezoratorlar ornatýǵa bolady. Bul – japondyq innovatsiialyq ázirleme. Apparattar Qazaqstanǵa jetkizildi. Dezinfektsiialaýshy qural sertifikattalǵan, tekserýden ótken jáne Densaýlyq saqtaý ministrliginiń sanepidbaqylaý komitetinde tirkelgen. Eger bul baǵdarlama maquldansa, ony da engizemiz», - dedi Almatynyń bas sanitarlyq dárigeri.
Ol qala oqýshylaryn qaýipsiz oqytýdy qamtamasyz etý – vedomstvo jumysynyń basty baǵyty ekenin erekshe atap ótti.
«Biz balalardy qaýipsiz jaǵdaida oqytý úshin muqiiat daiyndalyp jatyrmyz. Jańa oqý jylynda olardy oflain oqytýdy qamtamasyz etýimiz kerek. Bir jyldan beri balalar qashyqtan oqyp keledi jáne bul, árine bilim sapasyna áser etedi», - dedi Bekshin.
Stýdentter boiynsha Bekshin JOO men kolledjderde oqytýshylarǵa vaktsinalaý joǵary deńgeide júrgiziletinin aitty. Sondai-aq, joǵary jáne orta arnaýly oqý oryndaryna «Ashyq» júiesin engizý máselesi qoiylyp otyr.
J.Bekshin stýdentter arasynda vaktsinalaý boiynsha túsindirý jumystary júrgizilip jatqanyn jetkizdi.
«Stýdentter de onlain oqýdan sharshady. Biraq olardy tolyǵymen qorǵaý úshin barlyq talaptardy oryndap, mektepterde ǵana emes, qalanyń kolledjderi men JOO-da qaýipsiz bilim alýy úshin jaǵdai jasaý qajet», - dedi Almatynyń bas sanitarlyq dárigeri.
