Qazaqstanda temeki ónimderin zańsyz tasymaldaǵany úshin sottalǵan 10 adamnan memleket kirisine 7,3 mlrd teńgeden astam qarajat óndiriletin boldy. Buǵan deiin memleketke keltirilgen zalal ótelmegen, dep habarlaidy ult.kz.
Tergeý derekterine sáikes, 2024 jyldyń qańtar-tamyz ailarynda sottalǵandar aldyn ala sóz bailasyp, Eýraziialyq ekonomikalyq odaqtyń kedendik shekarasy arqyly temeki ónimderin birneshe ret zańsyz ótkizgen. Jalpy quny 7,3 mlrd teńgeden asatyn taýarlar kedendik baqylaýdan jasyrylǵan.
Sot olardy ekonomikalyq kontrabanda jasaǵany úshin kináli dep tanyǵanymen, memleketke keltirilgen zalal óndirilmegen.
Prokýratýranyń narazylyǵynan keiin isti Qylmystyq ister jónindegi kassatsiialyq sot qaita qarap, sottalǵandardan 7,3 mlrd teńgeden astam qarajatty ortaq tártippen memleket kirisine óndirip alý týraly sheshim shyǵardy.
