Tanymal ánshi Erkesh Hasen «Juldyzdy jekpe-jek» baǵdarlamasynda Qobylandy Bolattyń án oryndaý mánerin synǵa aldy, dep habarlaidy ult.kz.
Baǵdarlamada qazylyq etken Erkesh Hasen qatysýshynyń ónerine qatysty oiyn ashyq aitty. Onyń pikirinshe, ándi áserli jetkizý úshin daýysty barynsha kóterýdiń qajeti joq. Ánshi sahnadaǵy shynaiy emotsiia men orynsyz aiqaidyń ara-jigin ajyrata bilý mańyzdy ekenin jetkizdi.
«Qarsylyq tanytyp jatyr dep aiyp etpeńizder. Biraq men oqyǵan adam retinde aitaiyn. Meniń oiymsha, bul ánde aiqaiǵa salýdyń eshqandai reti joq sekildi. Tek kórermen retinde ǵana. Qairat aǵa, bul emotsiia emes, bul aiqai», – dedi Erkesh Hasen.
Osy sátte qazylar alqasyndaǵy Qairat Ádilgerei áriptesiniń pikirimen ázildese kelispei, Qobylandynyń án oryndaý barysynda emotsiiasyn kórsetkenin aitty.
Eki qazynyń pikir almasýy baǵdarlamadaǵy erekshe sátterdiń birine ainaldy. Keiin bul úzindi áleýmettik jelide taralyp, kópshiliktiń talqysyna tústi.
Jeli qoldanýshylarynyń arasynda ánshiniń synyn qoldaǵandar da, sahnada emotsiiany ashyq kórsetýge bolatynyn aitqandar da boldy.
Erkesh Hasen kim?
Erkesh Hasen – qazaqstandyq ánshi, kompozitor jáne telejúrgizýshi. Ol 1997 jyly 16 tamyzda Aqtóbe oblysynyń Hromtaý qalasynda dúniege kelgen. Bolashaq ánshi segiz ailyq kezinde anasynan aiyrylyp, ákesi men ájesiniń tárbiesinde ósken. Bala kezinen mýzykaǵa qyzyǵyp, túrli óner baiqaýlaryna qatysqan. Alǵashqy jetistikteriniń biri – "Balbóbek" baiqaýynda bas júlde ielenýi. Keiin belgili kompozitor Marat Omarovtyń shákirti atanyp, kásibi óner jolyna qadam basty. 2011 jyly Reseidiń "Minýta slavy" televiziialyq jobasyna qatysyp, finalǵa deiin jetti. Qazaqstandyq kórermen ony "Aigólek" balalar baǵdarlamasynyń júrgizýshisi retinde de tanidy.
Erkesh Hasen T. Júrgenov atyndaǵy Qazaq ulttyq óner akademiiasynda bilim alǵan. Shyǵarmashylyq jolynda Alem Band tobynyń quramynda án aityp, keiin jeke oryndaýshy retinde tanyldy. Onyń "Kóziń ádemi", "Jylama", "Botam-aý", "Durys bolmady" jáne "Ákem patsha" ánderi tyńdarmanǵa belgili. Ásirese 2022 jyly jaryq kórgen "Kóziń ádemi" áni áleýmettik jelilerde keńinen taralyp, tanymaldylyǵyn arttyrdy. Ánshi bul týyndynyń áýenin ózi jazǵanyn, al sózin aqyn Shadiiar Esenáli shyǵarǵanyn aitqan.
Erkesh Hasen ánshilikten bólek, «Óz úiim» jáne «Meniń bapkerim» telehikaialarynda akter retinde óner kórsetti. Sondai-aq ol Qýandyq Rahym, Ádilet Jaýǵashar jáne basqa da otandyq oryndaýshylarǵa án jazyp, kompozitor retinde de tanyldy.
