QR Densaýlyq saqtaý vitse-ministri Qamaljan Nádirov ushaq apatynan zardap shekkenderdiń jaǵdaiy týraly aitty, dep habarlaidy "Ult aqparat".
«Ushaq apatynan qaitys bolǵan adamdardyń otbasy men týystaryna qaiǵyryp kóńil aitamyn. Zardap shekkenderge jedel meditsinalyq kómek kórsetý úshin Almaty qalasy men Almaty oblysynyń 86 brigada jumyldyryldy. 103-ke alǵashqy qońyraý tańǵy 07:43-te tústi. Jedel járdem oqiǵa ornyna 15 minýtta jetti. Barlyǵy 67 adam jaraqat aldy, onyń 49-y aýrýhanaǵa jatqyzyldy. Arasynda 9 bala bar. 5 adam tekserýden keiin ambýlatoriialyq emdeýge jiberildi. 12 adam qaitys boldy. 8 adam - oqiǵa ornynda, taǵy ekeýi tasymaldaý kezinde jáne 2 eresek adam alǵan jaraqatynan kóz jumdy», - dedi Qamaljan Nádirov.
Onyń aitýynsha, qazir aýrýhanada 47 adam jatyr. 8-niń jaǵdaiy óte aýyr, 38 - ortasha aýyr, bireýiniń hali - ortasha.
10 eresek jáne 2 kishkentai balaǵa ota jasaldy. Zardap shekkender birneshe meditsinalyq mekemege jatqyzyldy.
6 naýqas Almaty kópsalaly klinikalyq aýrýhanasyna jetkizildi, onyń bireýi tekserýden keiin ambýlatorlyq emdeýge jiberildi. 5 naýqastyń jaǵdaiy aýyr, turaqty dep baǵalanyp otyr.
Balalarǵa arnalǵan jedel meditsinalyq kómek kórsetý ortalyǵyna túrli jaraqatpen 9 bala tústi. Qazirgi ýaqytta jeteýiniń jaǵdaiy - aýyr, turaqty, ekeýiniki - ortasha aýyr. 2 balaǵa ota sátti jasaldy. Ómirine qaýip tónip turǵan joq.
Jedel shuǵyl kómek kórsetý aýrýhanasyna 14 adam jetkizildi. Onyń ekeýi dárigerlerdiń tekserýinen keiin ambýlatoriialyq emdeýge jiberildi, 12 naýqastyń jaǵdaiy ortasha dep baǵalandy.
