Almatyda 90 mln teńgege satyp alynǵan jeke qorǵanys quraldary qoimada jatyr, dep habarlaidy "Ult aqparat".
Sybailas jemqorlyqqa qarsy qyzmet janyndaǵy arnaiy monitoringtik top Almatynyń bas sanitar dárigeri Jandarbek Bekshinniń ótinishi boiynsha qoimada bir jylǵa jýyq saqtalǵan jeke qorǵanys quraldaryn tekserdi.
Qoimada túsirilgen videony Facebook-te Sybailas jemqorlyqqa qarsy qyzmet janyndaǵy arnaiy monitoring toby tóraǵasynyń orynbasary Rafael Gasanov jariialady.
Tekserý barysynda, qoimadaǵa taýarlar 2020 jyldyń maýsym aiynda respýblikalyq biýdjetten bólingen aqshaǵa satyp alynǵany anyqtaldy. 90 mln teńgege 12 myńǵa jýyq kostiým ákelingen. Bir jiyntyq 7500 teńge turady. Qazir qoimada 7028 danasy bar.
Jandarbek Bekshin kostiýmderdi tekserip, olardyń talaptarǵa sai kelmeitinin aitty.
«Qoimada meditsinalyq emes, qurylysshylarǵa arnalǵan jeke qorǵanys kiimderi saqtalǵany belgili boldy. Olar shań men boiaýdan qorǵaidy, alaida sý ótkizedi, sondyqtan epidemiologtardyń qoldanýyna jaramsyz. Men materialdardy sybailas jemqorlyqqa qarsy is-qimyl departamentine tapsyrdym. Olardyń tapsyrysymen saraptama jasaldy «, - dedi J.Bekshin tikelei efir kezinde.
Sondai-aq, bas sanitar dáriger qoimada densaýlyq saqtaý ministrliginiń talaptaryna sáikes kelmeitin kózildirikter, maskalar da bar ekenin aitty. Tipti, kishigirm eksperiment jasady.
«Muny qarapaiym túrde eshqandai zerthanasyz tekserýge bolady. Eger sý ótse, onda virýs ta ótedi. Men mundai kiimdermen epidemiologtarymdy aýrý oshaǵyna jibere almaimyn. Qujattarǵa qarasańyz da sáikes kelmeidi», - dedi Jandarbek Bekshin.
Qalanyń bas sanitar dárigeri osy fakti boiynsha sotqa júgingenin de jetkizdi.
Onyń aitýynsha, bul qalada jeke qorǵanys quraldary jetispeitinin bildiredi. Qoimadaǵy qor eki aiǵa da jetpeidi. Qazir jeke qorǵanys quraldarynyń bólikterin basqa aimaqtardan satyp alýǵa týra keledi.
