Almatyda QR Qarýly Kúshteriniń áskeri qyzmetshileri qala kósheleri men ǵimarattaryn, qoǵamdyq oryndardy dezinfektsiialaý jumystaryn júrgizip jatyr, dep habarlaidy "Ult aqparat".
Qala boiynsha zararsyzdandyrý jumystaryna Almaty garnizonynyń 2 myńǵa jýyq áskeri qyzmetshisi jumyldyrylǵan.
Arnaiy bólimshe qyzmetkerleri Almatydaǵy 248 nysan: mektep, balabaqsha, balalar alańy, emhanalar, terminaldar aimaǵyn zararsyzdandyrdy.
Sonymen qatar QR Qarýly Kúshteriniń arnaiy bólimsheleri avtobýs aialdamalaryn, trotýarlardy, avtokólik turaqtaryn dezinfektsiialaityn bolady.
Ol úshin jeke quram qajetti arnaiy tehnikamen, degazatsiialyq kostiýmdermen, zararsyzdandyrý suiyqtyqtarymen qamtylǵan.
«Bizdiń basty maqsatymyz – infektsiianyń taralýyn toqtatý. Koronavirýstyń jańa túri aýada 3 saǵattai, zattardyń ústinde 48 saǵat turady degen maǵlumat bar, aýa arqyly juqtyrý qaýpi joǵary. Sondyqtan, kósheler men qoǵamdyq oryndardy dezinfektsiialaý – jumystyń asa mańyzdy baǵyty. Búginde jalpy kólemi 1 mln 392 sharshy metr bolatyn 81 nysan zararsyzdandyryldy. Oǵan 500 adam 24 tehnika jumyldyryldy», - dedi maior Almas Qasymhanov.
Aita ketý kerek, karantin rejimin saqtaý aiasynda 21 blokbekette 230 áskeri qyzmetshi qyzmet etip jatyr.
Osy ýaqytta Qazaqstanda koronavirýs juqtyrǵandardyń sany 97-ge jetti.
