Almatydaǵy Yqylas atyndaǵy halyq mýzykalyq aspaptary mýzeiine Shákárim Qudaiberdiulynyń dombyrasy tapsyryldy, dep habarlaidy QazAqparat tilshisi.
Qundy jádigerdi mýzeige Shákárimniń urpaǵy tabystady.
«Medǵat Quljanov atasy Shákárimniń dombyrasyn jyldar boiy saqtap kelgen. Ol Shákárimniń tikelei urpaǵy bolyp keledi. Oǵan dombyrany 15 jyl buryn Semeidegi ýniversitettiń rektory tapsyrǵan», - dedi mýzeidiń ǵylymi qyzmetkeri Qýanysh Kúlesh.
Dombyra - qos ishek pen 13 perneden turady, tutas aǵashtan oiyp jasalǵan. Dombyrany kim ári qashan jasaǵany belgisiz.
Shákárimniń dombyraǵa áýestigin kórgen Abai Bitkenbai rýynan ataqty sheberlerdi alǵyzady. Sol sheberlerdiń biri Qudaiberdi aýylynda 1 jyldai turyp, jas Shákárimge «Saimaqtyń sary ózeni», «Alshaǵyrdyń ashty kúii», «Asan kúii», «Ala bairaq», «Kertolǵaý» siiaqty ataqty kúilerdi úiretedi.
Shákárim ylǵi óz estelikterinde dombyrany úiretken Bitkenbai ustaz ekendigin aityp otyrǵan. 14-15 jasynan aqynnyń ózi de mýzyka jaza bastaidy.
Qýanysh Kúleshtiń aitýynsha, Shákárimniń qolyndaǵy kúmbirlegen qara dombyra endi halyq murasyna ainalmaq.
Aqynnyń urpaqtary bul dombyrany kóziniń qarashyǵyndai saqtap kelgen. Medǵat Quljanovtyń ákesi kezinde Shákárimniń shyǵarmalaryn oryndaýǵa qumartqan.
Aita keteiik, búginde mýzeide 1000 asa ulttyq aspap saqtalyp tur. Abai, Birjan, Jambyl, Yqylas, Seitek, Dina Nurpeiisova, Ahmet Jubanov, Kenen Ázirbaev, Ábiken Hasenov taǵy basqa aqyn-jyraýlardyń, kompozitorlardyń 60 jýyq dombyrasy bar.
