Almaty infektsionisteri vaktsinalaýdyńmańyzdylyǵyn túsindirdi, dep habarlaidy QazAqparat.
Dárigerlerdiń aitýynsha, COVID-19 emdeý úshin arnaiy preparattar joq, sonyń saldarynan asqynýlar baiqalady. Sondyqtan, vaktsina saldyrý qajet.
Koronavirýsqa qarsy jappai immýndaýdyń birinshi kezeńinde: infektsiialyq aýrýhanalardyń, jedel meditsinalyq járdemniń, reanimatsiia bólimsheleriniń, qabyldaý bólmeleriniń meditsina qyzmetkerleri, sanitarlyq -epidemiologiialyq qyzmet mamandary vaktsinatsiialanady.
Almatyda vaktsinatsiia egýge arnalǵan 40 kabinet ashyldy. Alǵashqy kúni 360 adamǵa salyndy.
Óz kezeginde sanitarlyq-epidemiologiialyq baqylaý departamentiniń infektsiialyq jáne parazittik aýrýlardy baqylaý bóliminiń basshysy Almash Ahmetova vaktsinatsiia júrgizýdiń mańyzdylyǵyn túsindirdi.
Álemdegi pandemiiaǵa bailanysty 2020 jyldyń naýryz aiynan bastap qalada koronavirýstyq infektsiia boiynsha epidemiologiialyq qolaisyzdyq baiqalýda. COVID-19-bul jańa infektsiia bolǵandyqtan, halyqtyń kópshiliginde bul infektsiiaǵa qarsy ózine tán immýnitet joq. KVI patsientterin tiimdi emdeý úshin arnaiy preparattar joq, sonyń saldarynan aýrýdyń asqynýy jaisyz jaǵdailarǵa alyp keletini baiqalady», - deidi ol.
Mamannyń aitýynsha, júrgizilip jatqan shekteý, sanitarlyq-profilaktikalyq, sanitarlyq-epidemiiaǵa qarsy is-sharalar kesheni halyq arasynda infektsiianyń taralýyn ýaqytsha toqtatýǵa múmkindik beredi.
Koronavirýs infektsiia boiynsha epidemiialyq jaǵdaidy turaqtandyrýdy qamtamasyz etý, pandemiiaǵa qarsy is-qimyl jáne halyqty koronavirýstyq infektsiiadan erekshe qorǵaýmen qamtamasyz etý maqsatynda Qazaqstan Respýblikasy Prezidentiniń tapsyrmasy boiynsha QR Bas memlekettik sanitariialyq dárigeriniń 27.01.2021 jylǵy №3 qaýlysyna sáikes, halyqtyń ártúrli toptarynyń epidemiologiialyq mańyzdylyǵyn eskere otyryp (basymdyǵy boiynsha) COVID-19-ǵa qarsy vaktsinatsiialaýdy kezeń-kezeńimen júrgizý bastaldy. Koronavirýs infektsiiany juqtyrý jáne taratý qaýpi joǵary halyqtyń áleýmettik osal toptary odan ári immýndaýǵa jatatyn halyqtyń qalǵan toptaryn qamti otyryp, vaktsinatsiialaýǵa jatady.
Koronavirýs infektsiiasyn juqtyrý jáne ony taratý qaýpi joǵary toptar úshin vaktsinatsiialaý memleket esebinen tegin júrgiziledi.
Eske salaiyq, alǵashqy bolyp erikti túrde Almaty qalasy ákiminiń orynbasary E. Babaqumarov, Qoǵamdyq densaýlyq saqtaý basqarmasynyń basshysy N.Tabynbaev jáne qalalyq sanitarlyq-epidemiologiialyq baqylaý departamentiniń basshysy J. Bekshin, sondai-aq máslihat depýtaty, №5 QKA bas dárigeri B. Sadyqov vaktsinatsiiadan ótti.
Almaty qalasy ákiminiń orynbasary Erjan Babaqumarov halyqty immýndaýdyń mańyzdylyǵyn atap ótti.
«Vaktsinatsiia – koronavirýs infektsiiaǵa qarsy turýdyń jalǵyz ádisi. Ómirdiń burynǵy yrǵaǵyna oralý úshin virýspen kúresýdiń osy tiimdi kezeńinen ótý kerek. Qoǵamdyq densaýlyq jáne árqaisymyzdyń, jaqyndarymyzdyń densaýlyǵy osyǵan bailanysty»,-dedi Erjan Babaqumarov.
Qazaqstanda vaktsinatsiia erikti túrde júrgiziledi. QR «Halyq densaýlyǵy jáne densaýlyq saqtaý júiesi týraly» Kodeksiniń 77-babyna sáikes kez kelgen meditsinalyq rásim, onyń ishinde vaktsinatsiia egilýshiniń tek aqparattandyrylǵan kelisimimen ǵana júrgiziledi. Qazaqstanda vaktsinatsiiadan bas tartqany úshin ákimshilik nemese qylmystyq jaýapkershilik qarastyrylmaǵan.
