Almaty sanitarlyq normalarǵa salynatyn ákimshilik aiyppuldar boiynsha Qazaqstanda kósh bastap tur. Bul týraly onlain brifing barysynda qalalyq kásipkerler palatasynyń direktory Nariman Ábilshaiyqov aitty, dep habarlaidy QazAqparat.
Onyń aitýynsha Almaty qalasynyń bas sanitarlyq dárigeriniń qaýlysyna qulaq aspaityn jekelegen kásipkerler bar.
«Bizdiń qalamyz búginde ákimshilik aiyppuldar sany boiynsha Qazaqstan qalalary arasynda birinshi orynǵa shyǵyp, antireitinginiń kóshbasshysyna ainaldy. Almaty qalasy taýarlar men qyzmetterdiń sapasy men qaýipsizdigin baqylaý departamentiniń málimetinshe, 5 shilde men 9 qazan aralyǵynda 3 837 nysan tekserý sharasy ótkizilip, QR Ákimshilik quqyq buzýshylyq týraly kodeksiniń 425-baby boiynsha barlyǵy ákimshilik buzýshylyqtar týraly 4 myńǵa jýyq hattama toltyryldy. Salynǵan aippuldyń jalpy somasy 235 mln teńgeden asady», - dedi ol.
Joǵaryda atalǵan kezeń aralyqta elimizde jalpy 895 mln teńgege 16 myńǵa jýyq hattama jasalǵan. Onyń ishinde 307 mln teńgesi jeke tulǵalarǵa salynǵan aiyppul.
Búgingi tańda Almaty qalasynda 26 monitoring toby jumys isteidi, olardyń quramynda politsiia, taýarlar men kórsetiletin qyzmetterdiń sapasy men qaýipsizdigin baqylaý departamenti, aýdandyq basqarmalar, kásipkerler palatasynyń ókilderi bar. Sondai-aq, bul toptyń jumysyna úkimettik emes uiymdar ókilderi men eriktiler úles qosyp júr.
Monitoring toptarynyń maqsaty - koronavirýs infektsiiasynyń keń taralýyna jol bermeý jáne qala turǵyndary arasynda juqtyrýdyń aldyn alý.
