Básekelestikti qorǵaý jáne damytý agenttiginiń Almaty qalasy boiynsha departamenti qaladaǵy iri avtosalondardyń áreketinen monopoliiaǵa qarsy zańnamany buzý belgilerin anyqtady, dep habarlaidy "Ult aqparat" vedomstvonyń baspasóz qyzmetine silteme jasap.
"Jańa avtokólikterdi satý naryǵyndaǵy básekelestik jaǵdaiyn taldaý nátijeleri, sondai-aq Almaty qalasy prokýratýrasynyń materialdary negizinde, «Astana Motors Motor Company» JShS (Hyundai Premium Almaty, Hyundai Auto Almaty, Hyundai Premium Batys, Súiinbaidaǵy Toyota Center), «Orbis Auto» JShS (Nissan Center, Toyota City, Volkswagen Center) jáne «Toyota Tsusho Kazakhstan Auto» JShS (Toyota Center Jetisý, Lexus Center Almaty) áreketterine qatysty, ústem jaǵdaidy teris paidalaný bóliginde, tutynýshylarǵa qosymsha taýarlardy tańý jáne avtokólikterdi satý boiynsha qyzmetter kórsetýde Qazaqstan Respýblikasynyń básekelestik zańnamasyn buzý belgileri anyqtaldy" - delingen habarlamada.
Vedomstvo málimetinshe, 27 maýsym kúni atalǵan naryq sýbektilerine mundai zańbuzýshylyqtardy toqtatý jáne aldaǵy ýaqytta oǵan jol bermeý qajettigi týraly habarlamalar jiberilgen.
"Kásipkerlik kodekstiń normalaryna sáikes, naryq sýbektisi habarlamada kórsetilgen áreketterdi belgilengen merzimderde toqtatpasa, monopoliiaǵa qarsy organ tergep-tekserý júrgizý týraly sheshim qabyldaidy. Habarlamany oryndaýdyń jáne onyń oryndalǵany týraly aqparatty usynýdyń sońǵy merzimi ony naryq sýbektisi alǵan kúnnen bastap kúntizbelik otyz kúndi quraidy" - deidi agenttiktiń baspasóz qyzmeti.
