.webp)
1 maýsym kúni iske qosylǵan Almaty áýejaiynyń jańa terminalynda BAQ ókilderine baspasóz týry uiymdastyryldy. Is-shara barysynda halyqaralyq áýejaidyń jaqynda taǵaiyndalǵan prezidenti Goker Kose jańa terminalǵa áleýmettik jelide aitylǵan synǵa jaýap berdi. Bul týraly "Ult aqparat" "Qazaqparat" agenttigine silteme jasap habarlaidy.
Áýejai basshysy jańa terminaldyń áinegi shytynaǵany beinelengen videoǵa bailanysty pikir bildirdi.
«Bul ǵimarat seismikalyq normalar men standarttarǵa sai salynǵan. Biraq jańa ǵimarat kishkene otyrady. Sol turaqtaný kezinde keibir shyny men áinekterde kishigirim jarylǵan jerler bolady. Biz ony almastyramyz. Bul qalypty jaǵdai», - dedi áýejai prezidenti.
Sondai-aq ol kei jolaýshylardyń júkti uzaq kútýiniń sebebin túsindirdi. Goker Koseniń aitýynsha, mundai qiyndyqtar eski terminaldan jańasyna kóshý kezinde týyndaǵan. Aldaǵy ýaqytta júkteri alý protsesin 45-50 minýttan asyrmaý josparlanyp otyr.
«Infraqurylym boiynsha biz barlyq jumystary aiaqtadyq. Biraq keibir kommertsiialyq aimaqtar áli salynyp jatyr. Eski terminaldan jańasyna kóshý kezinde qiyndyqtar týyndady. Jolaýshylar men olardyń júkterin qabyldaý tehnologiialary jáne jańa jabdyqtar ornatylyp jatyr. Keibiri tolyq ornatylǵan joq. Sondyqtan osyndai keleńsiz oqiǵalar bolyp jatyr. Biraq jaqyn ýaqytta ondai keleńsizdikter tolyqtai sheshiledi dep ýáde bere alamyn. Ushaq qonǵan sátten bastap, júk alǵan sátke deiingi ýaqytty 45-50 minýtqa jetkizemiz», - dedi ol.
Almaty áýejaiynyń prezidenti jańa terminal búginge deiin 1,5 myń reisti qabyldaǵanyn jáne kúndelikti 16 myń jolaýshyǵa qyzmet kórsetip jatqanyn atap ótti. Sondai-aq Goker Kose almatylyqtardy ýaqytsha qolaisyzdarǵa túsinistikpen qaraýǵa shaqyryp, oryndy syndy qabyldaýǵa daiyn ekenin aitty. Onyń sózinshe, jańa terminalǵa kóshý jumystaryn júrip kele jatqan kóliktiń dóńgelegin aýystyrýmen salystyrýǵa bolady.
«Iá, synnan habarym bar. Ótkenge qaraityn bolsaq, eski terminaldyń syiymdylyǵy 2,5 million boldy. Alaida biz 10 millionǵa deiin jolaýshyǵa qyzmet kórsettik. Ekinshisi, biz jańa terminalǵa tez arada kóshýge májbúr boldyq. Eger biz bul terminalǵa kóshpegende kóptegen reisterden bas tartýǵa týra keletin edi. Kóshý kezinde árine, keleńsiz jaǵdailar bolyp turady. Biz oryndy synǵa daiynbyz jáne ol boiynsha jumys isteimiz. Álemdik tájiribeden jumys istep jatqan terminaldan jańa terminalǵa kóshý jáne ekeýin bir ýaqytta basqarý óte qiyn ekenin bilemiz. Eýropada bul 4 jylǵa deiin sozylatyn edi. Biz muny 2 jylda jasai aldyq. Bul jyldamdyqpen kele jatqan kóliktiń dóńgelegin aýystyrý sekildi», - dep atap ótti Goker Kose.
Aita keteiik, buǵan deiin Prezident Almaty áýejaiynyń jańa halyqaralyq terminalyn aralaǵanyn jazǵan edik.
