Foto: Parktime.ru
Burynǵy ákim Viktor Hrapýnov Almaty áýejaiynyń ǵimaratyn jeke kompaniiaǵa zańsyz satyp jibergen, - dep habarlaidy Massaget.kz portaly QR Bas prokýratýrasynyń derekterine silteme jasap.
Bas prokýratýra ókilderi Qazaqstanǵa qarajatty qaitarý jónindegi vedomstvoaralyq komissiianyń jumysyn úilestirý aiasynda organdar táýelsiz taldaýlar men tekserý sharalaryn júrgizip jatqanyn málimdedi.
Atap aitqanda, zańsyz ielikten shyǵarylǵan nysandardy, berilgen jer telimderin qaitarý boiynsha 13 talap-aryz berildi. Bes milliard teńge zańsyz berilgen nemese paidalanylmai jatqan 140 myń gektardan asa jer telimderi qadaǵalaý aktilerimen qaitaryldy.
Oligopoliialardyń paidasyna negizsiz shyǵarylǵan sot aktileriniń kúshin joiýǵa 23 narazylyq berildi. Prokýrorlyq tekserýlerdiń qorytyndysy boiynsha, qylmystyq qýdalaý organdary ártúrli teris paidalaný, memleket múlki men biýdjet qarajatyn urlaý deregi boiynsha 12 sotaldy tergeý amaldaryn bastady.
"Almaty halyqaralyq áýejaiyndaǵy dúkender, barlar men meiramhanalar aimaǵy zańsyz satylǵany anyqtaldy. Olardy 2003 jyly ákim Hrapýnov jeke kompaniiaǵa zańsyz satyp jibergen. Satylǵan aimaqtyń quny - 333,7 million teńge. Áýejai terminalynyń 1 601,1 sharshy metrine quqyq belgileitin qujattardy zańsyz dep taný týraly sotqa talap-aryz berdik", - dedi Bas prokýratýra ókilderi.
