Almaty kóliktegi politsiia departamenti mas jolaýshyny urǵan politsiia qyzmetkerine qatysty túsinikteme berdi. Áýejaida bolǵan tóbelestiń videosy áleýmettik jelide taraldy.
Qalalyq Kóliktegi PD baspasóz qyzmetiniń habarlaýynsha, oqiǵa 2 qarashada bolǵan.
Almaty áýejaiyndaǵy politsiianyń jelilik bólimine «FlyArystan» kompaniiasynyń qyzmetkerlerinen habarlama túsken.
Qyzmetker Almaty - Qostanai baǵytynda ushatyn 8-geitte mas adamnyń shý kóterip jatqanyn aitqan.
«Tekserý barysynda politsiia qyzmetkerleri 36 jastaǵy er adamdy ustady. Kezekshi bólimine jetkizilgen soń da jolaýshy dórekilik tanytty. Balaǵattap, qarsylyq kórsetti. Sondyqtan, politsiia qyzmetkeri oǵan kúsh kórsetýine týra keldi. Meditsinalyq kýálandyrýdyń nátijesinde ol orta dárejede mas ekeni anyqtaldy», - dedi PD.
Jolaýshyǵa qatysty QR QK 378-babynyń 1-bólimimen qylmystyq is qozǵaldy.
Al búlik shyǵarǵan adamdy ustaýda dórekilik tanytqany úshin politsiia qyzmetkeri A. Eleýsizov ishki organdaǵy qyzmetinen qýyldy.
Sonymen qatar, jelilik politsiia bóliminiń 8 laýazymdy tulǵasy tártiptik jazaǵa tartyldy.
