Almaty ákimi halyqpen esepti kezdesýinde jolaqysy kóteriledi degen qaýesetke qatysty núkte qoidy, dep habarlaidy "Ult Aqparat" QazAqparatqa silteme jasap.
Baýyrjan Baibektiń aitýynsha, biyl jańa avtobýs alǵan tasymaldaýshylarǵa 15 mlrd teńge kóleminde demeýqarjy bólmek. Bul qarjyǵa 255 myń adamnyń jeńildikpen júrýi qamtamasyz etiledi.
«Qazir Almatyda avtobýs parki 30%-ǵa jańarǵan. Biraq keibir tasymaldaýshylar 80 teńgeni az kórip, 150 teńgege kóterý kerek dep jatyr. Olar jolaqysyn kótermekshi, biraq tasymaldaý sapasyn arttyrýǵa nietti emes. Ondai tasymaldaýshylarmen jeke jumys jasaimyz. Sapany kótermeiinshe, jolaqysy qymbattamaidy», - dedi Baýyrjan Baibek.
Qala ákimi «shyǵynǵa jumys jasap jatyrmyz» degen tasymaldaýshylar aqshany kúrep kelgenin aitty.
«Sonda sizderdiń qyzmetkerlerińiz 5 jyl boiy shyǵynǵa jumys jasap kelgen be? Aqylǵa syimaidy. Naryqtyń kólemi 20 mlrd teńge ekenin bildik. Endi kez kelgen tasymaldaýshy nesie ala alady. Jol júrý aqysy qazir Almatyda metro úshin 71,3 teńge, al avtobýstarda 80 teńge. Qalǵan aiyrmany 4 mlrd teńge kóleminde demeýqarjy jabady», - dedi B.Baibek.
