Almatyda Tailand Koroldigi Premer-ministriniń orynbasary – Syrtqy ister ministri Sihasak Pýangketkeonyń, Qazaqstan Respýblikasy Syrtqy ister ministriniń orynbasary Arman Isetovtiń, Almaty qalasynyń ákimi Darhan Satybaldynyń, Almaty oblysynyń ákimi Marat Sultanǵazievtiń, sondai-aq eki eldiń memlekettik organdary men biznes qaýymdastyǵy ókilderiniń qatysýymen Qazaqstan–Tailand biznes-forýmy ótti, dep habarlaidy ult.kz.
Is-shara Qazaqstan men Tailand arasyndaǵy saýda-ekonomikalyq jáne investitsiialyq yntymaqtastyqty odan ári damytý aiasynda uiymdastyryldy. Ońtústik-Shyǵys Aziia elderimen ózara is-qimyldy keńeitý Qazaqstannyń syrtqy ekonomikalyq saiasatynyń basym baǵyttarynyń biri sanalady.
Quttyqtaý sózinde Darhan Satybaldy Qazaqstan Respýblikasynyń Prezidenti Qasym-Jomart Toqaev álemniń qarqyndy damyp kele jatqan óńirlerimen, sonyń ishinde Aziia elderimen bailanysty nyǵaitýdyń mańyzyn birneshe ret atap ótkenin aitty.
«Búginde bizdiń aldymyzda saýda qatynastaryn damytý ǵana emes, sonymen qatar birlesken investitsiialyq jobalardy iske asyrýǵa, tehnologiia almasýǵa jáne ozyq halyqaralyq tájiribeni tartýǵa qolaily jaǵdai jasaý mindeti tur», – dedi Almaty qalasynyń ákimi.
Darhan Satybaldy forýmǵa qatysýshylarǵa Almatynyń ekonomikalyq áleýetin tanystyryp, Tailand kompaniialarymen yntymaqtastyqtyń múmkindikti baǵyttaryn atap ótti. Atap aitqanda, qalalyq infraqurylymdy damytý, týrizm, tsifrlyq tehnologiia, Smart City, ónerkásiptik kooperatsiia, logistika jáne tamaq ónerkásibi salalaryndaǵy áriptestikti keńeitýge basymdyq beriletinin jetkizdi.
Qala ákimi Almaty Qazaqstannyń ekonomikasynyń eleýli bóligin qalyptastyratyn eń iri ekonomikalyq ortalyq ekenin jáne sheteldik kompaniialardyń Ortalyq Aziia men Eýraziialyq ekonomikalyq odaq naryǵyna shyǵýyna múmkindik beretin mańyzdy alań qyzmetin atqaratynyn atap ótti.
Forým aiasynda Qazaqstan men Almatynyń investitsiialyq múmkindikteri tanystyrylyp, eki eldiń biznes ókilderi arasynda iskerlik kezdesý uiymdastyryldy.
Is-sharaǵa development, tsifrlyq sheshim, tamaq óndirisi, logistika jáne innovatsiia salasynda jumys isteitin Tailandtyń jetekshi kompaniialarynyń basshylary qatysty.
2025 jyldyń qorytyndysy boiynsha Almaty men Tailand arasyndaǵy taýar ainalymy 130 mln AQSh dollaryna jetip, 7,1 paiyzǵa artty. Búginde Almatyda tai kapitaly bar 24 kásiporyn tirkelgen.
Forým Qazaqstan men Tailand arasyndaǵy jańa birlesken jobalardy talqylaýǵa jáne iskerlik bailanysty odan ári nyǵaitýǵa arnalǵan tiimdi dialog alańyna ainaldy.
