Almaty ákimi Baqytjan Saǵyntaev qaladaǵy karantin talaptaryna qatysty túsinik berdi, dep habarlaidy "Ult aqparat".
Onyń aitýynsha, Úkimet otyrysynan soń qalada qaýipsizdik sharalary kúsheitile túspek.
«Qaýipti indettiń ýshyǵa túsýine bailanysty Úkimet epidjaǵdaidy turaqtandyrý boiynsha jańa sharalardy qolǵa aldy. Osy oraida Almatyda da karantin rejimin kúsheitý boiynsha qosymsha sharalar qabyldandy.
Senbi-jeksenbi, iaǵni 20-21 maýsym kúnderi iri saýda jáne qyzmet kórsetý nysandarynyń qyzmeti toqtatylady. Buǵan qosa saiabaqtar, skverler men jaiaý júrginshiler aimaǵy, ózender men sý qoimalarynyń jaǵalaýlary, taý shańǵysy kýrorttary jáne basqa da qoǵamdyq oryndar jabylady», - dedi ol áleýmettik jelidegi paraqshasynda.
Ákim karantin sharalaryn bosańsytý COVID-19-dyń órshýine ákep soqqanyn aitty.
«Osyǵan bailanysty qala turǵyndaryn bul jumystarǵa túsinistikpen qaraýǵa shaqyramyn. Karantin sharalaryn bosańsytý – COVID-19-dyń órshýine ákep soqty. Qala turǵyndarynan kóshede júrýin shektetýin suraimyz. Ásirese qart adamdardyń úide otyrǵany abzal. Qaýipi dendep bara jatqan myna aýrýdy tunshyqtyrý ózimizge bailanysty ekenin esten shyǵarmaiyq. Barlyq týyndaǵan suraqtar boiynsha 1308 nómirindegi call-ortalyqqa habarlasýǵa bolady», - dedi qala basshysy.
Buǵan deiin QR Premer-Ministri Asqar Maminniń tóraǵalyǵymen QR aýmaǵynda koronavirýs infektsiiasynyń taralýyna jol bermeý jónindegi vedomstvoaralyq komissiianyń (VAK) selektorlyq otyrysy ótkenin jazǵan edik. Onda QR Prezidenti Qasym-Jomart Toqaevtyń tapsyrmasyna sáikes Qazaqstandaǵy epidemiologiialyq jaǵdaidy turaqtandyrý boiynsha qosymsha sharalar qaraldy.
