Almaty ákimdigi Teńizden kelgen qyzmetkerlerdi úi karantinine jibermei, jataqhanaǵa oqshaýlaý sebebin túsindirdi, dep habarlaidy "Ult aqparat".
Keshe 200 vahtalyq qyzmetker Atyraý oblysynan arnaiy reispen oralǵan bolatyn.
Teńiz kenishiniń qyzmetkerleri búgin úi karantinine jibermedi dep BAQ ókilderine shaǵymdandy.
Olar Atyraýdan shyǵarda koronavirýsqa test tapsyrǵan. Jumyskerlerdiń paiymdaýynsha, qaita-qaita analiz tapsyrýdyń qajetti joq.
Qalalyq ákimdiktiń habarlaýynsha, olar jataqhanada meditsinalyq qyzmetkerlerdiń baqylaýynda bolmaq.
«Olar Qurmanǵazy 113 a mekenjaiynda ornalasqan Qazaq Ulttyq meditsinalyq ýniversitetiniń jataqhanasyna jatqyzyldy. Osy ýniversitet klinikasynyń dárigerleri olardyń densaýlyǵyn baqylaityn bolady. Áý bastan úilerine jiberiledi degen aqparat bolǵan joq. Kelgender 1-2 kún karantinde oqshaýlanyp, PTsR test tapsyryp, nátijesi teris shyqqan jaǵdaida ǵana 14 kúnge úi karantinine jiberiledi», - dedi ákimdikten.
Qalalyq Qoǵamdyq densaýlyq saqtaý basqarmasynyń habarlaýynsha, 200 adamnan bir ýaqytta analiz alý birshama ýaqytty alady.
Qala ákiminiń birinshi orynbasary Erlan Qojaǵapanov munyń aldynda Atyraýdan kelgen «Teńizshevroil» JShS qyzmetkerleri karantinge jatqyzylatynyn aitqan bolatyn. Munyń aldynda jetkizilgen bortta bir qyzmetkerden virýs tabylǵan.
