Almatyǵa jaýǵan qar qalyńdyǵy 80 santimetrge deiin jetti. Bul týraly búgin Úkimettiń selektorlyq rejimdegi otyrysynda Almaty qalasynyń ákimi Baýyrjan Baibek málim etti, dep habarlaidy Ult.kz tilshisi QazAqparat agenttigine silteme jasap.
«Qarashanyń 16-20-sy aralyǵynda qalaǵa jaýǵan qardyń qalyńdyǵy 60-tan 80 santimetrge deiin jetti. Bul ortasha ailyq normadan úsh esege artyq. Osyny eskere otyryp, qala kóshelerin qardan tazalaý jumystary kúsheitilgen rejimde júrgizilýde. Tolyqtai alǵanda, qar tazalaý jumystaryna qalanyń barlyq kommýnaldyq sharýashylyqtary, Tótenshe jaǵdailar departamenti, Energetika basqarmasy, aýdan ákimdikteri kúni-túni jumyldyryldy», - dedi ol.
Almaty ákiminiń aitýynsha, kún saiyn qar tazalaý jumystaryna 760-tan astam tehnika men 1600-den astam jumysshy jumyldyrylýda.
«Buǵan qosa, qosymsha qala kásiporyndarynyń 128 tehnikasy men 5 myńǵa deiin adam tartyldy. Eń birinshiden, joldardy, áleýmettik-ákimshilik nysandardy, adamdar kóp jinalatyn áýejai, vokzal, saýda ortalyqtary, bazarlar mańyn qardan tazartý sharalary qolǵa alynýda», - dedi Baibek.
Sonymen qatar ol qala kóleminiń úlkendigine jáne irleges jaqtan eldi mekenderdiń kóptigine bailanysty qardy dalaǵa shyǵarý barysynda qiyndyqtar týyndap otyrǵandyǵyn da atap ótti.
«Sońǵy 4 táýlikte 95 myń tekshe metr qar tústi. Bul ótken qysta túsken qardan áldeqaida kóp. Apta ishinde biz 250 myń tonnaǵa deiin qar shyǵarýdy josparlap otyrmyz. Jumystar kúndiz jáne túngi ýaqytta kúsheitilgen aýysymmen júrgizilip jatyr. Aýa raiyn eskere otyryp, qar shyǵarý jumystaryn úzdiksiz júrgizý maqsatynda jergilikti biýdjetten osy aptada qosymsha 400 mln. teńge bólinetin bolady», - dedi qala ákimi.
.jpeg)