Almaty-2 vokzalynda órt shyqty, - dep habarlaidy Tengrinews.kz Tótenshe jaǵdailar ministrligi baspasóz qyzmetine silteme jasap.
Áleýmettik jelide Almaty-2 vokzalynyń ǵimaratynan jolaýshylar evakýatsiialaǵany týraly habarlama paida boldy. Tótenshe jaǵdailar ministrliginiń baspasóz qyzmeti aqparatty rastady. 29 qarashada saǵat 14:08-de vokzal ǵimaratynyń tóbesi órtenip jatqany týraly habarlama túsken. Oqiǵa ornynda Tótenshe jaǵdailar departamentiniń qyzmetkerleri, 43 órtsóndirýshi men 14 tehnika jumys istep jatyr.
"Aldyn ala 100 sharshy metr alańda vokzaldyń negizgi ǵimaraty shatyrynyń aǵash taqtaishasy órtendi, adamdar ǵimarattan óz betinshe shyqty, zardap shekkender joq. Saǵat 14:30-da órt oqshaýlandy", - dedi TJM ókilderi.
Saǵat 14.50-de órt sóndirildi. Vokzal shtattyq rejimde jumys istep jatqany, poiyzdar keshikpegeni atap ótildi. Órttiń shyǵý sebebi anyqtalyp jatyr.
